एजेन्सी – झन्डै एक वर्षपछि स्वीडेन फुटबल फेडेरेसनले भेट्रान फरवार्ड ज्लाटन इब्राहिमोभिचलाई टोलीमा समेटेको छ ।
स्वीडेनले ४१ वर्षीय फरवार्डलाई युरोकप छनोटका लागि टोलीमा समेटेको हो । स्वीडेनले यसै महिना (मार्च) को अन्त्यमा बेल्जियम र अजरबैजानसँग खेल्दैछ ।
घुँडाको चोटका कारण इटालियन क्लब एसी मिलानका फरवार्ड सिजनको अधिकांश समय मैदान बाहिर छन् । तर, उनी पछिल्लो समय टोलीमा फर्कदै खेलिरहेका छन् ।
यस सिजन एसी मिलानका लागि बेन्चबाट तीन पटक खेलिसकेका इब्राहिमोभिच पछिल्लो पटक सन् २०२२ मा विश्वकप छनोट प्लेअफमा पोल्याण्डसँग पराजित भएको खेल खेलेका थिए ।
सन् २०१६ को युरोकप पछि अन्तर्राष्ट्रिय फुटबल छाडेका ज्लाटन सन् २०२१ मा विश्वकप छनोट दौरान नै टोलीमा फर्किएका थिए । स्वीडेनका प्रशिक्षक जेन एन्डरसनले इब्राहिमोभिच ‘स्टार्टर’ को रूपमा नरहेपनि उनी ‘प्रतिस्थापन सम्भावना’ रहेको बताएका छन् ।
इंग्लिस क्लब म्यानचेस्टर युनाइटेड र फ्रान्सेली क्लब पेरिस सेन्ट जर्मेनका पूर्व फरवार्ड ज्लाटनले स्वीडेनका लागि १२१ खेलमा ६२ अन्तर्राष्ट्रिय गोल गरेका छन् । उनी स्वीडेनका सर्वकालीन शीर्ष गोलकर्ता समेत हुन् ।
