सिलगुढी (एजेन्सी)– पहिलो पटक महिला साफ च्याम्पियनसिपमा नेपाल र भारतमध्ये एउटा टोलीले मात्र फाइनल खेल्नेछ । भारतको सिलगुढीमा जारी च्याम्पियनसिपमा अर्को तिर फाइनलको प्रतिद्वन्द्वि बंगलादेश र माल्दिभ्समध्ये हुनेछ । यसअघिका तीनै संस्करणमा फाइनल खेलेका नेपाल र भारत यसपटक एक कदमअघि नै भेट्दैछन् ।

साफ च्याम्पिनसिपमा मात्र होइन दक्षिण एसियाली खेलकुद (साग) को फाइनलमा पनि नेपाल र भारतबीच मात्र प्रतिस्पर्धा हुँदै आएको छ । यसपटक बंगलादेशसँगको गोलरहित बराबरीका कारण भारत समूहको उपविजेताका रुपमा सेमिफाइनलमा पुग्न बाध्य भयो । जसका कारण अर्को समूहको विजेता नेपाल र भारतबीच सेमिफाइनलमा नै भेट्दैछन् ।

नेपाल र भारत १० महिला अघि १२ औं सागको फाइनलमा भेट भएको थियो । त्यो नतिजा नेपालका लागि भने विर्सनलायक रह्यो । भारत ४–० ले विजयी भएको थियो । तर भारती टोलीका मुख्य प्रशिक्षक साजिद दार पछिल्लो नतिजालाई लिएर अहिलेको नतिजा अनुमान गर्न तयार छैनन् । उनको नजरमा यसपटक नेपाल निकै तयारीका साथ सिलगुढी पुगेको छ ।

बंगलादेशविरुद्धको समूह चरणको अन्तिम खेलका लागि गोलका लागि निकै तडपिएको भारतका प्रशिक्षक नेपाल निकै फरक रुपमा यसपटक प्रस्तुत भएको मान्छन् । दी एआइएफएफलाई दिएको अन्तवार्तामा नेपाललाई बाँकी टोलीभन्दा एकदम अगाडि मानेका छन् ।

‘नेपाल निकै बलियो टोली हो । हरेक च्याम्पिनसिपमा उनीले दाबेदारी प्रस्तु गर्दै आएका छन्’ उनले भने ‘यसपटक उनीहरु अझै राम्रो तयारीका साथ आएका छन् । पछिल्लो दुई महिना उनीहरुले तयारीमा विताएका छन् । लामो समयदेखि सँगै अभ्यास गर्दा टोली चुस्त बन्नेछ । मलेसियासँगको मैत्रीपूर्ण खेलले उनीहरु थप अनुभवी बनेका छन् ।’
नेपालविरुद्ध भारतको सफल इतिहास भएपनि सधै त्यहि नतिजा दोहोरिन्छ भन्ने कुनै ग्यारेन्टी नभएको जनाउँदै दारले भनेका छन्,‘यो नयाँ च्याम्पियनसिप हो र यहाँ सबै चिज फरक छन् । तथापी, इतिहासले हामी अझै पनि गर्न सक्छौ भन्ने मनोबल दिन्छ । ’

जारी च्याम्पियनसिपका दौरान नेपालले गरेको प्रदर्शनका आधारमा यसपटक थप मजबुद भए टोली सिलगुढी पुगेको उनको ठम्माई । दारले थपे ‘ लिग चरणका खेललाई हेर्ने हो भने यसपटक उनीहरु फरक योजनाका साथ आएका छन् ।’ नेपालले समूह चरणमा भुटानलाई ८–०, माल्दिभ्सलाई ९–० र श्रीलंकालाई १–० ले हराएको थियो । बंगलादेशसँगको बराबरीले टोली स्तब्ध नभएको उल्लेख गर्दै दारले फुटबलमा अप्रत्यासित नतिजा आउनुलाई स्वभाविक मानेका छन् ।

अप्रत्यासित नतिजाले टोलीलाई आउने खेलमा सफलता प्राप्त गर्न प्रेरित गर्ने उनको बुझाई छ । बंगलादेशले पुरा खेल रक्षात्मक खेलको स्मरण गर्दै उनले आफ्नो टोलीले गोलका लागि केही राम्रो मौका पाएको बताए । ‘हाम्रो दुईवटा प्रहार क्रसबारमा लागेर फर्कियो । त्यसबाट पनि थाहा हुन्छ खेलमा हामी कति हावी छौं भन्ने’ दारले भने, ‘अभ्इासमा पनि हामीले फिनिसिङमा बढी ध्यान दिएका छौं । यद्दपी हामीले सुधार गर्न आवश्यक छ । ’

नेपालसँगको सेमिफाइनलका लागि आफ्नो टोली रहेको जनाउँदै दारले भने ‘हामीले भन्दा नेपालले एक दिन बढी आरामको मौका पाएको थियो । तर पनि हामी आफ्नो उत्कृष्ट दिन तयार छौं । योजना अनुरुप प्रदर्शन गर्नेमा हामी प्रतिबद्ध छौं । नेपालसँगको खेल हाम्रा लागि फाइनल सरह हुनेछ ।’