एजेन्सी – इटालियन क्लब एसी मिलानका फरवार्ड ज्लाटन इब्राहिमोभिच सिरी ए को इतिहासमा गोल गर्ने सबैभन्दा भेट्रान खेलाडी बनेका छन् ।

उडिनेसेसँग ३–१ ले पराजित भएको खेलमा ज्लाटनले एक गोल गर्दै उनी सिरी ‘ए’ मा गोल गर्ने सबैभन्दा पाका खेलाडी बनेका हुन् ।

४१ वर्षीय इब्राहिमोभिचले पहिलो हाफको अन्त्यमा पेनाल्टीमार्फत गोल गरेका थिए । सुरुवाती पेनाल्टी चुकाएपनि पुनः रि पाएको पेनाल्टीमा ज्लाटन चुकेनन् । घुँडाको गम्भीर चोटबाट फर्किएपछि ज्लाटनको यो पहिलो गोल हो ।

ज्लाटनले ४१ वर्ष १६६ दिनमा गोल गर्दै अलेसान्ड्रो कोस्टाकुर्टाले ४१ वर्ष २५ दिनको कीर्तिमानलाई तोडेका हुन् । इब्राहिमोभिचले गत सिजन मिलानलाई सिरी एको उपाधि जिताउन मद्दत गरेका थिए । गत समरमै लिगामेन्टको चोटमा शल्यक्रिया गर्नुपरेपछि उनी लामो समय मैदान बाहिर रहेका थिए । उनी फेब्रुअरीमा मात्रै खेलमा फर्किएका थिए ।

खेलको नवौं मिनेटमा मिलान रोबर्टाे पेरेराको गोलबाट पछि परेको थियो । त्यसपछि ज्लाटनले गोल गर्दै खेललाई १–१ गोलको बराबरीमा ल्याए । पहिलो हाफमै घरेलु टोली उडिनेस १० खेलाडीमा समेटिन पुगेको थियो ।

एन्ड्रिया सोटिल सिधै रातो कार्ड खाँदै मैदानबाट बाहिरिए । पहिलो हाफको इन्ज्युरी समयमै बेटोले गोल गर्दै उडिनेसलाई २–१ को अग्रता दिलाए । त्यसपछि ७०औं मिनेटमा किङ्सलेले गोल गर्दै उडिनेसलाई ३–१ को जित दिलाए ।

यस हारले मिलान २७ खेलबाट ४८ अंक जोडेर चौथो स्थानमा यथावत रहेको छ । उडिनेस ३८ अंक जोडेर आठौं स्थानमा उक्लिएको छ ।