एजेन्सी – सुरुवाती अग्रता जोगाउन नसक्दा बायर्न म्युनिख जर्मन बुन्डेसलिगामा पराजित भएको छ । बायर्न घरेलु टोली बायर लिभरकुसनसँग २–१ ले पराजित भएको हो ।

बायर लिभरकुसेनको जितमा दुवै गोल एक्सिक्यल पालासिओसले गरे । बायर्नका योसुवा किम्मिखको गोल सान्त्वना बन्यो । बे एरिना लिभरकुसेनमा आइतबार राति भएको खेलको २६औं मिनेटमा योसुवा किम्मिखको गोलबाट बायर्नले सुरुवाती अग्रता लिएको थियो ।

उनले लियोन गोरेट्जाको पासमा गोल गर्न सफल भएका थिए । तर, बायर्नले त्यो अग्रतालाई दोस्रो हाफमा जोगाउन सकेन ।५५औं मिनेटमा पालासिओसले पेनाल्टीमा गोल गर्दै खेललाई १–१ गोलको बराबरीमा ल्याए ।

एमिन एडीलिलाई पेनाल्टी बक्समा बेन्जामिन पाभार्डले फउल गरेपछि रेफ्रीले भिएआरको सहायता लिदै पेनाल्टी प्रदान गर्दा पालासिओस चुकेनन् ।

७३औं मिनेटमा पालासिओसले पेनाल्टीमै गोल गर्दै बायर्नलाई २–१ को हार चखाए । यसपटक पनि एमिनलाई डेअट उपमेकानोले फउल गरेपछि रेफ्रीले भिएआरको सहायता लिदै लिभरकुसनलाई पेनाल्टी प्रदान गर्दा पालासिओस चुकेनन् ।

बुन्डेस लिगमा बायर्नको यो तेस्रो हार हो । यसअघि बायर्न अग्सवर्ग र बोरुसिया मोन्चेनग्लाडवाकसँग पराजित भएको थियो । यस हारले बायर्नले शीर्षस्थानमा उक्लने मौका समेत गुमाएको छ । बायर्न २५ खेलबाट ५२ अंक जोडेर दोस्रो स्थानमा यथावत रहेको छ ।

समान खेलबाटै बोरुसिया डर्टमुन्ड ५३ अंक जोडेर शीर्षस्थानमा रहेको छ । बायर्नलाई हराएको बायर लिभरकुसन ३७ अंक जोडेर आठौं स्थानमा उक्लिएको छ ।