काठमाडौं (हाम्रो खेलकुद) – बुधबारदेखि नेपालमा आयोजना हुने प्रधानमन्त्री थ्री नेसन्स कपका लागि भुटानको राष्ट्रिय फुटबल टोली नेपाल आईपुगेका छन् ।

भुटानी टोली सोमबार बिहान नेपाल आईपुगेका हुन् । भुटानी टोलीलाई अखिल नेपाल फुटबल संघ (एन्फा) का प्रवक्ता सुरेश शाह लगायतले स्वागत गरे । प्रधानमन्त्री थ्री नेसन्स कपका लागि लाओसको टोली सोमबार नै नेपाल आइपुग्ने एन्फाले जनाएको छ ।

प्रधानमन्त्री थ्री नेसन्स कप त्रिपुरेश्वरस्थित दशरथ रंगशालामा चैत ८ देखि १७ गतेसम्म हुँदैछ । प्रधानमन्त्री थ्री नेसन्स कपमा घरेलु टोली नेपालसहित भुटान र लाओसको सहभागिता रहेको छ । सिंगल राउण्ड रोविनपछि शीर्ष दुई टोलीले उपाधिका लागि चैत १७ गते खेल्नेछ ।

नेपालले ८ चैतमा लाओससँग खेल्दै प्रधानमन्त्री थ्री नेसन्स कपको सुरुवात गर्नेछ । चैत ११ गते भुटान र लाओस भिड्नेछन् । चैत १४ गते नेपाल र भुटान भिड्नेछन् । फिफाले दुई म्याच डेका खेललाई मात्रै आफ्नो क्यालेन्डरमा समावेश गरेकाले फाइनल खेल फिफाको क्यालेन्डरमा नहुने एन्फाले जनाएको छ । 

नेपालले नवनियुक्त मुख्य प्रशिक्षक भिन्सेन्जो अल्बर्टो एनेसको प्रशिक्षणमा खेल्नेछ । तर, एन्फाले प्रधानमन्त्री थ्री नेसन्स कप आउन दुई दिन बाँकी रहँदासमेत टोली घोषणा गरेको छैन । प्रधानमन्त्री थ्री नेसन्स कपलाई सामान्य प्याराफिटतर्फ ५ सय र भीआईपीतर्फ १ हजार टिकट दर राखिएको छ ।