सुबास हुमागाईं, काठमाडौं

इटालियन प्रशिक्षक भिन्सेन्जो अल्बर्टो अनेसेले प्रधानमन्त्री कप थ्री नेसन्स कप फुटबल प्रतियोगिताका लागि २३ सदस्यीय टोलीको घोषणा गर्ने क्रममा ६ खेलाडीलाई पहिलो पटक राष्ट्रिय टोलीमा समेटेका छन् ।

एन्फाले गत साता मात्र इटालीका भिन्सेन्जो अल्बर्टो अनेसेलाई राष्ट्रिय टोलीको प्रशिक्षकको जिम्मेवारी सुम्पिएको थियो । ए डिभिजन लिगको प्रदर्शनलाई आधार मान्दै उनले टोली छनोट गरेका हुन् । मनाङ मर्स्याङ्दी क्लबका सुमित श्रेष्ठ, एपिएफ फुटबल क्लबका मणि लामा र सनिश श्रेष्ठ, एफसी खुलमटारका पदम भट्टराई, सातदोबाटो युथ क्लबका गोलरक्षक अभिषेक बराल र दीपकराज सिंह ठकुरी पहिलो पटक राष्ट्रिय टोलीमा परेका छन् ।

सुमित श्रेष्ठ – मनाङ मर्स्याङ्दी

फुटसलबाट राष्ट्रिय खेल जगतमा आफूलाई स्थापित गरेका सुमितले छोटो समयमा नै राष्ट्रिय टोलीको बन्द प्रशिक्षणमा स्थान बनाएका हुन् । स्पोर्ट्स कासलबाट फुटसल लिगको उपाधि जित्दा महत्त्वपूर्ण भूमिका निर्वाह गरेका उनी फुटबलमा विभिन्न पोजिसनमा खेल्ने गर्छन् । राष्ट्रिय यू-२० टोलीमा लेफ्ट ब्याक भूमिकामा खेल्ने उनी मनाङका लागि भने मिडफिल्डमा देखिएका छन् ।

मनाङका प्रशिक्षक किरण श्रेष्ठले सुमितको फरक पोजिसन खेल्ने क्षमताले खेलको अवस्था अनुसार रणनीति बदल्न निकै सहज हुने बताएका थिए । बायाँ खुट्टा बढी चलाउने सुमित विंगरको भूमिका पनि निर्वाह गर्न सक्छन् । प्राविधिक रुपमा निपुण उनी राष्ट्रिय टोलीमा लेफ्ट विंगमा देखिने सम्भावना छ ।

सनिश श्रेष्ठ – एपिएफ

फ्रेन्ड्स क्लबबाट ए डिभिजन लिग खेल्दै प्रभाव जमाएपछि एपीएफ पुगेका सनिश यसपटक लिगका उत्कृष्ट खेलाडीमा पर्छन् । एपिएफको लागि राइट ब्याक पोजिसनमा खेल्ने उनी आवश्यक पर्दा सेन्टर डिफेन्स पनि खेल्छन् । विदेशी डिफेन्डर अडामा डुम्बिया रातो कार्डका कारण निलम्बनमा पर्दा सनिशले नै डिफेन्स सम्हाले । अग्ला कदका सनिश विपक्षी आक्रमण रोक्न खप्पिस छन् र डेब्युको संघारमा छन् ।

मणि लामा – एपिएफ

फुटसलको राष्ट्रिय टोलीबाट नियमित खेल्दै आएका मणिले एपिएफ हुँदै राष्ट्रिय टोलीको यात्रा तय गरेका छन् । सेन्टर मिडफिल्डमा खेल्ने उनी आक्रमणमा बढी आवद्ध देखिन्छन् । बक्स टु बक्स भूमिका निर्वाह गर्दै आएका उनले दर्शनीय गोल पनि गरेका छन् । पछिल्लो समय प्रशिक्षक रत्नकाजी महर्जनले एपिएफमा उनलाई आक्रमणमा थप खुला भएर खेल्न दिएका छन् । दशरथ रंगशालामा उनको नजर डेब्यु क्यापमा हुनेछ ।

अभिषेक बराल – सातदोबाटो

थ्री स्टारको यू-१८ टोलीबाट आफ्नो करिअर सुरु गरेका अभिषेक आफ्नो ए डिभिजन करिअरको सुरुवातमा पनि थ्री स्टारकै सिनियर टोलीको बेन्चमा रहे । मेघराज केसीले पाटने क्लब छाडेर सातदोबाटो जाँदा गोलरक्षक प्रशिक्षक उज्ज्वल मानन्धर र अभिषेकलाई सँगै लग्नुले पनि अभिषेक लामो रेसको घोडा रहेको संकेत दिएको थियो ।

गत सिजन लिगमा सातदोबाटोको प्रदर्शनमा निर्णायक बनेका अभिषेकले यस सिजन पनि सोहि लयलाई निरन्तरता दिएका छन् । अग्लो कद र उत्कृष्ट सट स्टपरसँगै अभिषेकको बल वितरणको खुब प्रशंसा हुने गरेको छ । उनले पटक पटक काउन्टर अट्याकमा असिस्ट दिनुले पनि त्यसलाई प्रमाणित गर्छ ।

दीपक राज सिंह ठकुरी – सातदोबाटो

मोफसलको प्रतियोगितामा छाएका बाँकेका फरवार्डले यस सिजन सानदार सुरुवात गरेका छन् । उनले घरेलु फुटबलमा भने सुदूरपश्चिमबाट खेल्दै छाप बसाए । विगतमा सोचेजस्तो अवसर नपाएका उनी यस सिजन भने प्रशिक्षक सनोज श्रेष्ठको विश्वासमा खरो उत्रिएका छन् । तीव्र गतिले विपक्षीको डिफेन्सलाई समस्या दिने उनले ४ गोल गर्दै सातदोबाटोलाई लिगको अग्र स्थानमा पुर्याएका छन् । आफ्नो करिअरको उच्च विन्दुमा रहेका उनी राष्ट्रिय टोलीमा यो लय निरन्तरता दिने सोचमा हुनेछन् ।

पदम भट्टराई – खुमलटार

उमेर समूहको राष्ट्रिय टोलीबाट खेलेका पदम चोटका कारण लामो समय मैदानबाहिर रहे । चोटबाट पूर्ण रुपमा पुनरागमन गर्दै खुमलटारको डिफेन्स सम्हालेका पदम प्रशिक्षकको नजरमा परेका हुन् । एन्फा एकेडेमीका उत्पादन पदम शारीरिक रुपमा निपुण छन् । एन्फा एकेडेमीकै खेलाडीको बाक्लो उपस्थिति रहेको खुमलटारमा उनलाई खेल्न केहि सहज भएको छ ।

यस्तो छ पूर्ण टोली :

अन्तिम २३ सदस्यीय टोलीमा सहिद स्मारक ए डिभिजन लिगको पाँचौं चरणको समाप्तीमा अंक तालिकाको तेस्रो स्थानमा रहेको चर्च ब्वाइज युनाइटेड फुटबल क्लबबाट सर्वाधिक ४ खेलाडी समावेश गरिएको छ । अंकतालिकाको दोस्रो स्थानमा रहेको मनाङ, आर्मी र संकटा क्लबबाट समान ३, शीर्षस्थानमा रहेको सातदोबाटो बाट २ तथा जावलाखेल युथ क्लब, खुमलटार र मछिन्द्र एफसीबाट समान १ खेलाडी राष्ट्रिय टोलीमा परेका छन् ।

लिगका अन्य टोली थ्री स्टार क्लब, नेपाल पुलिस क्लब, फ्रेन्ड्स क्लब, न्यूरोड टिम एनआरटी र हिमालयन शेर्पाबाट भने राष्ट्रिय टोलीमा कोहि परेका छैनन् । भारतको राउन्ड ग्लास पन्जाबबाट खेल्दै आएका किरण चेम्जोङ र इन्डोनेसियाको प्रेसिक केडेरीका रोहित चन्द टोलीमा समावेश छन् ।

थ्री नेसन्सको उद्घाटन खेलमा नेपाल र लाओस भिड्द चैत ११ गते भुटान र लाओस तथा चैत १४ गते नेपाल र भुटानबीच प्रतिस्पर्धा हुनेछ । शीर्ष २ टोलीबीच चैत १६ गते फाइनल हुनेछ ।

राष्ट्रिय फुटबल टोली:

गोलरक्षक (३) – किरण चेम्जोङ (राउन्ड ग्लास पन्जाब, भारत), दीप कार्की (मनाङ), अभिषेक बराल (सातदोबाटो)

डिफेन्डर (७) – रोहित चन्द (प्रेसिक केडिरी, इन्डोनेसिया ), अनन्त तामाङ (चर्च ब्वाइज), आदित्य चौधरी (जावलाखेल), विकास खवास (आर्मी), सनिश श्रेष्ठ (एपिएफ), निशान खड्का (संकटा), पदम भट्टराई (खुमलटार)

मिडफिल्डर (८) – मणि लामा (एपिएफ), नविन लामा (एपिएफ), पुजन उपरकोटी (मछिन्द्र), एरिक विष्ट (चर्च ब्वाइज) , कमल थापा (मनाङ) , आशिष चौधरी (चर्च ब्वाइज), आयुष घलान (संकटा) र सुमित श्रेष्ठ (मनाङ)

फरवार्ड (५) – दीपक राज सिंह ठकुरी (सातदोबाटो), मनिष डाँगी (संकटा), नवयुग श्रेष्ठ (आर्मी), भरत खवास (आर्मी) र अन्जन विष्ट (चर्च ब्वाइज)