सुनिल गाउँले, सिमरा
मोफसलको प्रतिष्ठित फुटबल प्रतियोगिता मध्येको एक जगदम्बा जीतपुर सिमरा गोल्डकप फुटबल प्रतियोगिताको १३ औं संस्करण आज (बिहीबार ) सुरु हुँदैछ ।
फ्लड लाइटमा साँझ ६ः०० बजे सुरु हुने प्रतियोगिताको उद्घाटन खेलमा आयोजक नव जनजागृती यूवा क्लब सिमरा र केबिएग्लोबल भरतपुर फुटबल क्लब चितवनबीच प्रतिष्पर्धा हुनेछ ।
प्रतियोगितामा ए डिभिजनका ४ क्लब सहित १० टोलीको सहभागिता रहेको छ । ए डिभिजन टोली साविक विजेता न्युरोड टिम एनआरटी, एपिएफ फुटबल क्लब, हिमालयन शेर्पा क्लब, चर्च ब्वाइज युनाइटेड, सातदोबाटो युथ क्लब तथा बिएफसी चितवन, मकवानपुर ११ हेटौंडा, बागमती युवा क्लब सर्लाही, वीरगन्ज युनाइटेड क्लब र आयोजक नव जनजागृती युवा क्लबले प्रतिस्पर्धा गर्नेछन् ।
चैत १८ गते सम्म चल्ने प्रतियोगिताको विजेताले उपाधिसहित १० लाख र दोस्रो हुने टोलीले ५ लाख रुपैयाँ प्राप्त गर्नेछ ।प्रतियोगिताको सर्वोत्कृष्ठ खेलाडीले मोटरसाईकल वा स्कुटर पाउनेछन् । प्रतियोगिताका विधागततर्फका उत्कृष्ट गोलकिपर, डिफेन्स, मिडफिल्ड, फरवार्ड, सर्वाधिक गोलकर्ता र प्रशिक्षकले जनही २० हजार रुपैयाँ पाउनेछन । आयोजकले यस वर्ष पनि उदयीमान स्थानिय खेलाडीलाई १५ हजार रुपैयाँले पुरस्कृत गर्नेछ ।
