इटहरी (हाम्रो खेलकुद) – चर्च ब्वाइज युनाइटेड इटहरीमा जारी १३औं अन्तर्राष्ट्रिय आमन्त्रण गोल्डकपको फाइनलमा प्रवेश गरेको छ ।
साविक उपबिजेता त्रिभुवन आर्मी फुटबल क्लबलाई १–० ले पराजित गर्दै चर्च ब्वाइजले फाइनलमा सगरमाथा युथ क्लब, मोरङसँगको भेट पक्का गरेको हो । इटहरी रंगशालामा बिहीबार भएको सेमिफाइनलमा चर्च ब्वाइजको जितमा पहिलो हाफमा भएको आत्मघाती गोल नै निर्णायक बन्यो ।
२२औं मिनेटमा चर्च ब्वाइजको फ्रिकिकलाई क्लियर गर्न खोज्दा डिफेन्डर दीपक गुरुङले आफ्नै पोस्टमा गोल गर्न पुगेका थिए । त्यसपछि दुवै टिमबाट गोल हुन नसक्दा उक्त गोल नै निर्णायक बन्यो ।
खेल अवधिभर दुवै टोलीले गोल गर्ने उत्कृष्ट अवसर पाएपनि थप गोल निस्कन सकेन । चर्च व्वाइजका फ्रान्कलिन कोटे टाला म्यान अफ दि म्याच घोषित भए । उनले १० हजाररुपैयाँसहित ट्रफी हात पारे ।
फाइनल चैत ११ गते शनिबार इटहरी रंगशालामा हुनेछ । राष्ट्रिय जागृति क्लबको आयोजनामा भइरहेको प्रतियोगिताको विजेता टिमले नगद १० लाख र उपबिजेता टिमले नगद ५ लाख रुपैयाँ हात पार्ने आयोजकले जनाएको छ ।
गोल्डकपलाई कन्ट्रोल लुब्रिकेटले प्रायोजन गरेको छ । इटहरी उपमहानगरपालिकाको संयोजन रहने प्रतियोगिताका लागि खेलकुद विकास बोर्ड कोसी प्रदेशले १४ लाख र राष्ट्रिय खेलकुद परिषद्ले १० लाख रुपैयाँ सहयोग गरेका छन् ।
