एजेन्सी – १० खेलाडीमा समेटिएको इंग्ल्यान्डले युरोकप २०२४ को छनोटको पहिलो खेलमा इटालीलाई पराजित गरेकाे छ ।

इंग्ल्यान्डले घरेलु टोली इटालीमाथि २–१ को जित निकालेको हो । इंग्ल्यान्डको जितमा डिक्लन राइस र कप्तान ह्यारी केनले गोल गरे । इटालीका माटियो रेटेगुईले एक गोल फर्काए ।

डिएगो अर्मान्डो म्याराडोना स्टेडियम नेपोलीमा बिहीबार राति भएको रोमाञ्चक र प्रतिस्पर्धात्मक खेलको १३औं मिनेटमा डिक्लन राइसको गोलबाट इंग्ल्यान्डले घरेलु टोलीविरुद्ध सुरुवाती अग्रता लिन सफल भएको थियो ।

४४औं मिनेटमा कप्तान केनले पेनाल्टीमार्फत गोल गर्दै इंग्ल्यान्डलाई पहिलो हाफमा २–० को अग्रता दिलाए । बुकायो साकाको कर्नरमा जियोभानी डि लोरेन्जोले पेनाल्टी बक्समा ह्यान्ड गर्न पुगेपछि रेफ्रीले भिएआरको सहायतामा इंग्ल्यान्डलाई पेनाल्टी प्रदान गर्दा केन चुकेनन् । यस गोलसँगै केन इंग्ल्यान्डको सर्वाधिक गोलकर्ता बनेका छन् ।

५६औं मिनेटमा माटियो रेटेगुईले गोल गर्दै इटालीलाई खेलमा फर्कने संकेत देखाए । उनले लोरेन्जो पेलिग्रेनीको पासमा गोल गर्न सफल भएका थिए ।

८०औं मिनेटमा इंग्ल्यान्ड १० खेलाडीमा समेटिन पुग्यो । दुई मिनेटको अन्तरमा लुका शा दोहोरो पहेलो कार्ड खाँदै मैदानबाट बाहिरिएको थियो । तर, त्यसको फाइदा इटालीले उठाउन नसक्दा पराजय भोग्न पुग्यो ।

यस जितसँगै समूह ‘सी’ मा इंग्ल्यान्डले ३ अंब जोडेको छ । इटाली अंक विहीन छ । नर्थ म्यासेडोनियाको पनि ३ अंक छ । माल्टा अंक विहीन रहँदा युक्रेनले खेल खेलेको छैन ।

यही समूहको अर्काे खेलमा नर्थ म्यासेडोनियाले माल्टालाई २–१ ले पराजित गरेको छ । म्यासेडोनियाका इल्जिफ इल्मास र डार्काे चुर्लिनोभले गोल गरे । माल्टाका यानकाम यान्निकले गोल फर्काए । खेलको अन्तिम समयमा म्यासेडोनिका प्रशिक्षक विलागोजा मिलभेस्कीले रातो कार्ड खाँदै टच लाइन छाड्न बाध्य भए ।