काठमाडौं (हाम्रो खेलकुद) – फरवार्ड विमल घर्ती मगर चम्कँदा विराटनगर सिटी फुटबल क्लब सातौं विराट गोल्डकपको फाइनलमा पुगेको छ ।
विराटनगरस्थित सहिद मैदानमा सोमबार राती भएको पहिलो सेमिफाइनल खेलमा ‘ए’ डिभिजन क्लब जावलाखेल युथ क्लबलाई २–१ गोलले निराश बनाउँदै विराटनगर उपाधि नजिक पुगेको हो । विराटनगरका लागि स्टेफन बिनोङ र अभिषेक गुरूङले गोल गरे । चोटका कारण पछिल्लो १० दिनदेखि विश्राममा रहेका विमल विराटनगरको दुवै गोलमा संलग्न रहे । जावलाखेलको तर्फबाट हिसुब थपलियाले सान्तवना गोल फर्काए ।
५९ औं मिनेटमा विराटनगरका बिनोङले अग्रता दिए । विमलले पेनाल्टी एरियाबाट गरेको प्रहार जावलाखेलका गोलरक्षक अनिष देउलाले रोकेपनि बिनोङले रिबाउन्डलाई गोलमा परिणत गरे । ८७ औं मिनेटमा विराटनगर सिटीका विमल घर्तीमगरले दिएको पासमा अभिषेकले गोल गरे । उनले पेनाल्टी क्षेत्रको बाहिरबाट टप कर्नरमा सुन्दर गोल गरे ।
खेलको अन्त्यतिर जावलाखेलले लगातार अवसर गुमायो । ८९ औं मिनेटमा जावलाखेलका कप्तान सिमन्त थापाको प्रहार पोस्टभन्दा बाहिर गयो । लगत्तै सुनिल खड्काले डिबक्स भित्रबाट गरेको प्रहार विराटनगरका गोलरक्षक विशाल श्रेष्ठले विमल पारे । दोस्रो हाफको इन्जुरी हिसुब थपलियाले सान्तवना गोल फर्काएपनि नतिजा बदल्न भने सकेन ।
विराटनगरका बिनोङले प्लेयर अफ द म्याच बन्दै ११ हजार रुपैयाँ पाए । मंगलबार हुने दोस्रो सेमिफाइनल खेलमा भारत केरलाको लुका सकर क्लब र साविक विजेता विभागीय टिम एपीएफबीच हुनेछ ।
