एजेन्सी – इंग्लिस क्लब म्यानचेस्टर सिटीका डिफेन्डर नाथर एकेले दुई तथा स्पेनिस क्लब एट्लेटिको मड्रिडका फरवार्ड मेम्फिस डिपाएले एक गोल गरेसँगै नेदरल्यान्ड्सले युरो २०२४ को छनोटमा पहिलो जित हात पारेको छ ।
घरेलु मैदानमा नेदरल्यान्ड्सले १० ख्लाडीमा समेटिएको जिब्राल्टारमाथि ३–० को सहज जित हात पारेको हो । फेइजेनुर्डमा सोमबार राति भएको खेलमा नेदरल्यान्ड्सले पहिलो हाफमा एक गोल गर्दा दोस्रो हाफमा दुई गोल थप्दै जित पक्का गर्यो ।
खेलको २३औं मिनेटमा डिपाएले गोल गर्दै नेदरल्यान्ड्सलाई १–० को अग्रता दिलाए । उनले डेन्जेल डम्फ्रेजको पासलाई सदुपयोग गरे । त्यसपछिको दुवै गोल नाथन एकेको नाममा रह्यो ।
५०औं मिनेटमा नाथन एकेले गोल गर्दै नेदरल्यान्ड्सको अग्रता दोब्बर पारे । नाथनले डेन्जेलकै पासमा गोल गर्न सफल भएका थिए । गोल खाएको अअर्काे मिनेटमा नै जिब्राल्टार १० खेलाडीमा समेटिन पुग्यो ।
माट्स वेइफेरमाथि अनावश्यक फउल गरेपछि रेफ्रीले लियाम वाल्करलाई सिधै रातो कार्ड देखाउँदै मैदान बाहिर पठाए । त्यसपछि जिब्राल्टारको खेलमा फर्कने सम्भावना पनि टाढियो ।
त्यसपछि ८२औं मिनेटमा एकेले डाले ब्लिन्डको पासमा व्यक्तिगत दोस्रो तथा टोलीका लागि तेस्रो गोल गर्दै नेदरल्यान्ड्सलाई युरो छनोटमा पहिलो जित दिलाए । नेदरल्यान्ड्स पहिलो खेलमा फ्रान्ससँग ४–० ले पराजित भएको थियो ।
पहिलो जितसँगै नेदरल्यान्ड्स दुई खेलबाट ३ अंक बटुल्दै तेस्रो स्थानमा रहेको छ । जिब्राल्टार दुई खेलबाटै अंकविहीन हुँदै पुछारमा छ । एक खेल खेलेको ग्रीस ३ अंक जोडेर दोस्रो स्थानमा रहँदा आयरल्यान्डले पनि अंकको खाता खोल्न सकेको छैन । फ्रान्स ६ अंक जोडेर शीर्षस्थानमा रहेको छ ।
