एजेन्सी – युरो २०२४ को छनोट अन्तरगत समूह ‘एफ’ को खेलमा अष्ट्रिया र स्वीडेन विजयी भएका छन् । अष्ट्रियाले घरेलु मैदानमा इस्टोनियामाथि २–१ को पूनरागमन जित निकालेको हो ।

अष्ट्रियाको जितमा फ्लोरिएन काइन्ज र माइकल ग्रगोरिट्सले गोल गरे । इस्टोनियाका राउनो सापिनेनको गोल सान्त्वना बन्यो ।राइफफेइसेन एरिना लिन्ज अष्ट्रियामा सोमबार राति भएको खेललको १७औं मिनेटमा माइकल पेनाल्टीमा चुक्दा घरेलु टोली अष्ट्रिया अग्रता लिनबाट चुकेको थियो ।

२५औं मिनेटमा राउनोले गोल गरेपछि अष्ट्रिया खेलमा पछि परेको थियो । ६८औं मिनेटमा फ्लोरिएनले गोल गर्दै खेललाई १–१ गोलको बराबरीमा ल्याए । त्यसपछि ८८औं मिनेटमा माइकलले गोल गर्दै अष्ट्रियालाई जित दिलाए ।

यही समूहको अर्काे खेलमा स्वीडेनले अजरवैजानमाथि ५–० को फराकिलो जित निकालेको छ । स्वीडेनको फराकिलो जितमा इमिल फोर्सवर्ग, भिक्टोर ग्योकेरेस, जस्पर कार्लसन र एन्टोनी इलांगाले गोल गर्दा एक गोल उपहार पाएको थियो ।

यस नतिजासँगै समूह ‘एफ’ मा अष्ट्रिया ६ अंक जोडेर शीर्षस्थानमा रहेको छ । समान ३ अंक रहेपनि बेल्जियम दोस्रो तथा स्वीडेन तेस्रो स्थानमा रहेको छ । इस्टोनिया र अजरवैजान अंकविहीन छ ।