विराटनगर (हाम्रो खेलकुद) – भारत केरलाको लुका सकर फुटबल क्लबले विराट गोल्डकपको फाइनलमा प्रवेश गरेको छ । पहिलो पटक सहभागिता जनाएको लुका सकरले विराटनगरको सहिद रंगशालामा मंगलबार दोस्रो सेमिफाइनलमा साविक विजेता एपिएफलाई टाइब्रेकर ४–२ ले हराउँदै उपाधि नजिक पुगेको हो ।

निर्धारित र अतिरिक्त गोलरहित बराबरीमा टुंगिएपछि खेल टाइब्रेकरमा पुगेको थियो । पेनाल्टी सुटआउटमा लुका सकरका गोलपिकर सनफिर नायक रहे । सनफिर खेलको म्यान अफ द म्याच घोषित भएर उनले ११ हजार रुपैयाँ प्राप्त गरे ।

सनफिरले एपिएफका विशाल स्याङतानको प्रहारलाई उत्कृष्ट बचाउ गर्दै टोलीलाई अग्रता दिलाएका थिए । एपिएफका गोलकिपर राजु नगरकोटीको प्रहार बारमा लागेपछि लुकाको जितको आधार तयार भएको थियो ।

एपिएफका दीपेश धिमाल र सविन गुरुङले मात्र गोल गरेका थिए । लुकाका लागि चाल्स, मोहम्मद रफी, मोहम्मद असद र पउलले गोल गरेका थिए । क्यामुदिनको प्रहार भने एपिएफका गोलकिपर राजुले रोके । लुकाले बिहीबार हुने फाइनलमा विराटनगरसँग प्रतिस्पर्धा गर्नेछ ।

प्रतियोगिताको विजेताले उपाधिसहित २० लाख १५ हजार रुपैयाँ र दोस्रो हुने टोलीले १० लाख २५ हजार प्राप्त गर्ने छ । प्रतियोगिताका विधागततर्फ उत्कृष्ट खेलाडीले समान २५ हजार रुपैयाँ प्राप्त गर्नेछन् ।