एजेन्सी – भेट्रान फरवार्ड तथा कप्तान सुनिल क्षेत्रीको कीर्तिमानी गोलमा भारतले अन्तर्राष्ट्रिय मैत्रीपूर्ण खेलमा किर्गिस्तानलाई पराजित गरेको छ ।

घरेलु मैदानमा भारतले किर्गिस्तानमाथि २–० को सहज जित हात पारेको हो । भारतको जितमा सन्देश झिनगन र कप्तान सुनिल क्षेत्रीले गोल गरे ।

खुमन लाम्पक मेन स्टेडियम इम्पल भारतमा मंगलबार राति भएको खेलको ३६औं मिनेटमा सन्देशको गोलबाट भारतले सुरुवाती अग्रता लिन सफल भएको थियो ।

त्यसपछि ८४औं मिनेटमा कप्तान सुनिल क्षेत्रीले पेनाल्टीका गोल गर्दै भारतको जित पक्का गरे । किर्गिस्तानविरुद्ध पेनाल्टीमा गोल गरेसँगै सुनिल पुरुषतर्फ सर्वाधिक बढी गोल गर्ने खेलाडीको सुचीमा पाँचौ स्थानमा उक्लिएको छ । उनले हंगेरीका फेरेन्स पुस्कासलाई पछि पारेका हुन् । ३८ वर्षीय सुनिलले १३३ क्याप जित्दा ८५ अन्तर्राष्ट्रिय गोल गरेका छन् ।

पुरुषतर्फ सर्वाधिक गोलकर्ताको सुचीको शीर्षस्थानमा पोर्चुगलका क्रिष्टियानो रोनाल्डो रहेका छन् । रोनाल्डोले १९८ खेलमा १२२ गोल गरेका छन् । दोस्रो स्थानमा इरानका अली दाई छन् । उनले १४८ खेलमा १०९ गोल गरेका छन् ।

तेस्रो स्थानमा अर्जेन्टिनाका लियोनेल मेस्सी छन् । उनले १७३ खेलमा ९९ गोल गरेका छन् । चौथो स्थानमा मलेसियाका मोख्तर दाहरि छन् । उनले १८२ खेलमा ८९ गोल गरेका छन् ।