एजेन्सी – न्यूक्यासल युनाइटेडले इंग्लिस प्रिमियर लिगमा सानदार जित दर्ता गर्दा म्यानचेस्टर युनाइटेडले पनि सफलता हात पारेका छन् ।

न्यूक्यासलले वेस्ट ह्याम युनाइटेडमाथि ५–१ को सानदार जित निकालेको हो । न्यूक्यासलको जितमा कलुम विल्सन र जोइलिन्टनले समान दुई गोल गर्दा एलेक्सान्दर इसाकले एक गोल थपे । वेस्ट ह्यामका कर्ट जुमाले एक गोल फर्काए ।

लन्डन स्टेडियम लन्डनमा बुधबार राति भएको खेलको छैटौं मिनेटमा कलुम विल्सनको गोलबाट न्यूक्यासलले अग्रता लिन सफल भयो । उनले एलान सेन्ट म्याक्सिमिनको पासा गोल गर्न सफल भए । १३औं मिनेटमा जोइलिन्टने गोल गर्दै न्यूक्यासलको अग्रता दोब्बर पारे । उनले फावियनको पासलाई सदुपयोग गरे ।

४०औं मिनेटमा कर्ट जुमाले गोल गर्दै खेललाई पहिलो हाफमा २–१ को स्थितिमा ल्याए । उनले जरोड बोवेनको पासमा गोल गर्न सफल भएका थिए । ४६औं मिनेटमा विल्सनले व्यक्तिगत दोस्रो तथा टोलीका लागि तेस्रो गोल गरेपछि न्यूक्यासल सहज जिततर्फ अग्रसर बन्यो ।

८२औं मिनेटमा इसाकले गोल गर्दै न्यूक्यासललाई ४–१ ले अघि बढाए । त्यसपछि इन्ज्युरी समयमा जोइलिन्टनले व्यक्तिगत दोस्रो तथा टोलीका लागि पाँचौं गोल गर्दै टोलीलाई फराकिलो जित दिलाए ।

यस सानदार जितसँगै न्यूक्यासल २८ खेलबाट ५३ अंक जोडेर तेस्रो स्थानमा रहेको छ । पराजित वेस्ट ह्याम २७ अंक जोडेर १५औं स्थानमा छ ।

अर्काे खेलमा म्यानचेस्टर युनाइटेडले घरेलु मैदानमा ब्रेन्टफर्डलाई १–० ले पराजित गरेको छ । युनाइटेडको जितमा पहिलो हाफमा मार्कस रासफर्डले गरेको गोल नै निर्णायक बन्यो । उनले २७औं मिनेटमा मार्सेल सवित्जरको पासमा गोल गर्न सफल भएका थिए ।

यस जितसँगै युनाइटेड २८ खेलबाट ५३ अंक जोडेर चौथो स्थानमा यथावत रहेको छ । समान ५३ अंक नै रहेपनि न्यूक्यासल गोल अन्तरमा अघि छ । पराजित ब्रेन्टफर्ड २९ खेलबाट ४३ अंक जोडेर नवौं स्थानमा छ ।