एजेन्सी – स्पेनिस क्लब रियल म्याड्रिडका प्रशिक्षक कार्लाे एन्सेलोटीले फरवार्ड करिम बेन्जेमा, मिडफिल्डरद्धय लुका मोड्रिच र टोनी क्रुस अर्को सिजन रियल म्याड्रिडमै रहने विश्वास व्यक्त गरेका छन् ।

यि तीनैजना खेलाडीको सम्झौता यो सिजनको अन्त्यसँगै सकिदैछ । सम्झौता सकिने अन्त्यतिर रहँदा प्रशिक्षक एन्सेलोटीले उनीहरु र क्लबबीच सम्झौता नविकरणबारे छलफल भइरहेको बताएका छन् ।

फ्रान्सका पूर्व फरवार्ड ३५ वर्षीय बेन्जेमा र ३७ वर्षीय क्रोएसियाका कप्तान तथा मिडफिल्डर मोड्रिचले सन् २०१४ देखि रियलबाट पाँचपटक च्याम्पियन्स लिग उपाधि जितेका छन् । यस्तै जर्मनीका पूर्व मिडफिल्डर ३३ वर्षीय क्रुसले चारपटक च्याम्पियन्स लिग जितेका छन् ।

‘मलाई लाग्छ कि उनीहरु अर्काे सिजन पनि क्लबमै रहनेछन् ।’ प्रशिक्षक एन्सेलोटीले भने, ‘उनीहरुले नयाँ सम्झौताको विषयमा छलफल गरिरहेका छन् ।’

रियलले सन् २०१६ देखि एडुआर्डो कामाभिंगा, ड्यानी सेबालोस, ओरेलिएन चुआमेनी र फेडेरिको भाल्भर्डेलाई अनुबन्ध गरेर भविष्य तयार पारिरहेको छ । यो सिजन क्रुस र मोड्रिचले केही कम खेल खेलेपनि आफ्नो प्रभाव जमाइरहेका छन् ।

चोटका कारण सुरुवाती समयको खेल गुमाएको बेन्जेमा रियलको सर्वाधिक गोलकर्ता बनिसकेका छन् । बेन्जेमाले बुधबार राति कोपा डेल रेको सेमिफाइनलको दोस्रो लेगमा बार्सिलोनाविरुद्ध ४–० को जित निकालेको खेलमा ह्याट्रिक पूरा गरेका थिए ।

‘मलाई लाग्छ तिनीहरु (बेन्जेमा, क्रुस र मोड्रिच) क्लबमै रहनेछन् ।’ एन्सेलोटीले थपे, ‘हामीले खेलाडीको उमेरको नभई उनीहरुको प्रदर्शनको मुल्यांकन गर्नुपर्दछ । तपाईंले सोच्न सक्नुहुन्छ कि यी तीन खेलाडीमा युवा खेलाडीको जस्तो उर्जा छैन । तर, खेलको सन्दर्भको यि तीनको प्रभाव अद्धितिय छ । यस्ता प्रभावशाली खेलाडी सहजै पाइनेछैन ।’