काठमाडौं (हाम्रो खेलकुद) – भियतनामको महिला राष्ट्रिय टोली पेरिस ओलम्पिक २०२४ को एसियाली छनोट अन्तर्गत दोस्रो चरणमा प्रवेश गरेको छ । शनिबार दशरथ रंगशालामा भएको दोस्रो खेलमा २-० को जित हासिल गर्दै भियतनामले स्थान पक्का गरेको हो । पहिलो खेलमा भियतनाम ५-१ को जित दर्ता गरेको थियो ।

खेलको छैटौं मिनेटमा नै भियतनामले अग्रता लियो । गुएँ थि माइ आङको कर्नरमा फाम हाइ एनले गोल गरेकी थिइन् । उनको निकै फितलो प्रहार गोलरक्षक एन्जिला तुम्बापो सुब्बाको काँध मुनिबाट गोल भएको थियो ।

त्यसको एक मिनेट नबित्दै भियतनामले अग्रता दोब्बर पार्यो । पहिलो गोलको ८५ सेकेन्डपछि नै फामले अग्रता दोब्बर पारिन् । ट्रान थि थु थाओको लामो पासलाई फामले छातीले नियन्त्रणमा लिँदै गोलरक्षक एन्जिलाको टाउको माथिबाट गोल गरिन् ।

२३ औं मिनेटमा नेपालका लागि सावित्रा भण्डारीको प्रहार गोलरक्षक खोंग थि हांगले जोगाइन् । ३९ औं मिनेटमा सावित्राले नै डिफेन्स लाइन तोड्दै पेनाल्टी क्षेत्र भित्रबाट गरेको प्रहारमा गोलरक्षक हांग बाधक बनिन् ।

दोस्रो हाफमा नेपालले गोलरक्षक एन्जिलाको स्थानमा अन्जना राना मगरलाई मैदान उतारेको थियो । ६६ औं मिनेटमा नेपालको गोल फर्काउने अवसरमा पोस्ट बाधक बन्यो । दिपा शाहीले पेनाल्टी क्षेत्र भित्रबाट गरेको प्रहार पोस्टमा लाग्दै फर्केको थियो ।

यस नतिजासँगै नेपालको पेरिस २०२४ ओलम्पिक छनोटको यात्रा सकिएको छ । यसअघि सन् २०१८ मा नेपालले समूह चरणमा अपराजित रहँदै दोस्रो चरणको यात्रा तय गरेको थियो । त्यसबेला नेपालको समूहमा रहेका भारत, बंगलादेश र म्यानमारसँग नेपालले समान १-१ को बराबरी खेलेको थियो ।