एजेन्सी – स्पेनिस ला लिगामा रियल म्याड्रिडले घरेलु मैदानमै भिल्लारियलसँग हार बेहोरेको छ । रियल भिल्लारियलसँग ३–२ ले पराजित भएको हो ।

रियललाई पराजित गर्न भिल्लारियलका सामुइल चुकविजीले दुई तथा जोश लुइस मोरालेसले एक गोल गरे । रियलका भिनिसियस जुनियरले एक गोल गर्दा एक गोल उपहार पाएको थियो ।

सान्टियागो बर्नबेउमा शनिबार राति भएको रोमाञ्चक र प्रतिस्पर्धात्मक बनेको खेलमा बुधबार राति बार्सिलोनालाई पराजित गरेको रियलले खेलमा दुई पटक अग्रता लिएर पनि अपेक्षाकृत प्रदर्शन गर्न नसक्दा पराजय भोग्न पुग्यो ।

रियलले खेलको १६औं मिनेटमा पाउ टोरेसको आत्मघाती गोलबाट अग्रता लिएपनि त्यसलाई जोगाउन सकेन । ३९औं मिनेटमा सामुइल चुकविजीले जियोभानी लो सेल्सोको पासमा गोल गर्दै खेललाई पहिलो हाफमा १–१ गोलको बराबरीमा ल्याए ।

४८औं मिनेटमा भिनिसियसले गोल गर्दै रियललाई पुनः २–१ को अग्रता दिलाए । उनले ड्यानियल सेवालोसको पासमा गोल गर्न सफल भएका थिए । ७०औं मिनेटमा जोश लुइस मोरालेसले गोल गर्दै खेललाई २–२ गोलको बराबरीमा ल्याए ।

८०औं मिनेटमा सामुइल चुकविजीले व्यक्तिगत दोस्रो तथा टोलीका लागि तेस्रो गोल गर्दै भिल्लालाई ३–२ ले अघि बढाए । उनले एलेक्स बेइनाको पासलाई सदुपयोग गरेका थिए ।

८३औं मिनेटमा रेफ्रीले रियललाई पेनाल्टी प्रदान गरेपनि भिएआरबाट पेनाल्टीले मान्यता पाएन । त्यसपछि थप गोल निस्कन नसक्दा रियल घरेलु मैदानमा पराजित हुन पुग्यो ।

यस हारसँगै रियलको लालिगाको उपाधिको सम्भावना टाढिदै गएको छ । दोस्रो स्थानमा रहेको रियल शीर्षस्थानको बार्सिलोनासँग १२ अंकले पछि छ ।

रियलको २८ खेलबाट ५९ अंक रहँदा एक खेल कम खेलेको बार्सिलोनाको ७१ अंक छ । रियललाई हराएको भिल्लारियल ४७ अंक जोडेर पाँचौं स्थानमा उक्लिएको छ ।