होसमा फर्किए छिरिङ, स्थिति सामान्य

काठमाडौं (हाम्रो खेलकुद) – ए डिभिजन लिग अन्तर्गत संकटा क्लबविरुद्ध घाइते भएका मच्छिन्द्र फुटबल क्लबका डिफेन्डर छिरिङ गुरुङ होसमा फर्किएर सामान्य स्थितिमा आएका छन् ।

दशरथ रंगशालामा आइतबार भएको खेलको अन्तिम समयमा छिरिङ आफ्नै क्लबका पुजनसँग ठोक्किन पुगेका थिए । उनको टाउकोमा लागेपछि अकस्मात मैदानमा ढलेर अचेत भएका थिए । नजिकै रहेका संकटा क्लबका प्रशिक्षक सल्यान खड्गीले मुख खोलेर स्वासप्रस्वास रोकिन नदिएपछि टिम फिजियो सुरज भुसालसहित एन्फाको मेडिकल टोलीले तुरुन्त उनलाई होसमा ल्याउन सिपीआर (कार्डियो पल्मोनरी रिससिटेसन) दिएको थियो ।

झन्डै १ मिनेट अचेत रहेका उनलाई होसमा आएपछि एम्बुलेन्समा नजिकै रहेको ब्लु क्रस अस्पताल पुर्याइएको थियो । अस्पताल लगेपछि उनको प्रारम्भिक परिक्षणमा सामान्य अवस्था देखिएको क्लबका व्यवस्थापक अनिल श्रेष्ठले जानकारी दिए । उनको थप परिक्षण भने अस्पतालमा राखेर हुने बुझिएको छ ।