एनआरटीको पूनरागमन जित

काठमाडौं (हाम्रो खेलकुद) – न्युरोड टिम (एनआरटी) ले सहिद स्मारक ‘ए’ डिभिजन लिगमा हिमालयन शेर्पा क्लबमाथि रोमाञ्चक पूनरागमन जित निकालेको छ ।

एनआरटीले १–० ले पछि परेको स्थिति उल्ट्याएर २–१ को पूनरागमन जित निकालेको हो । एन्फा कम्प्लेक्समा आइतबार भएको खेलमा एनआरटीको जितमा रोहन खड्गी र जेनिश प्रजापतिले गोल गरे । शेर्पाका खामिर गिल्सन कनदङ्वाको गोल सान्त्वना बन्यो ।

खेलको १४औं मिनेटमा खामिरको गोलबाट एनआरटी पहिलो हाफमा १–० ले पछि परेको थियो । पहिलो हाफमा १–० ले पछि रहेको एनआरटीले दोस्रो हाफमा उत्कृष्ट प्रदर्शन गर्दै जित निकाल्न सफल भयो ।

६६औं मिनेटमा रोहन खड्गीले गोल गर्दै खेललाई १–१ गोलको बराबरीमा ल्याए । बराबरीतर्फ धकेलिएको खेलको अन्तिम समयमा जेनिश प्रजापतिले गोल गर्दै एनआरटीलाई रोमाञ्चक जित दिलाए ।

सातौं चरणमा आइपुग्दा एनआरटीको यो पहिलो जित हो । यसअघि एनआरटीले समान ३ बराबरी र ३ हारको नतिजा आत्मसात गरेको थियो । यस जितसँगै एनआरटीले ७ खेलबाट ६ अंक जोडेको छ । शेर्पाको पनि ६ अंक नै छ ।