काठमाडौं (हाम्रो खेलकुद) – त्रिभुवन आर्मी फुटबल क्लबले ३ पटक अग्रता जोगाउन नसक्दा सहिद स्मारक ए डिभिजन लिगमा सातदोबाटो युवा क्लबसँग अंक बाँडेको छ । दशरथ रंगशालामा आर्मी र सातदोबाटोको खेल ३-३ को बराबरीमा सकिएको हो ।

आर्मीका लागि जिलेस्पी जंग कार्कीले पहिलो हाफमा दुई गोल गर्दा सातदोबाटोले त्यसबिचमा बराबरी गोल गरेको थियो । दोस्रो हाफको सुरुवातमा सातदोबाटो खेलमा फर्केपनि दिपक गुरुङले आर्मीलाई अघि सारे । तर विलियम ओपोकुले ५ मिनेट बाँकी हुँदा फ्रिकिकमा दर्शनीय गोल गर्दै अंक दिलाए ।

यस बराबरीले सातदोबाटो ७ खेलमा १३ अंकसहित तेस्रो स्थानमा उक्लिएको छ । आर्मी भने ७ खेलमा ९ अंकका साथ मध्य तालिकामा अवस्थित छ ।

खेलको चौथो मिनेटमा जगजित श्रेष्ठको पासमा कप्तान जिलेस्पी जंग कार्कीले गोल गर्दै आर्मीलाई सुरुवाती अग्रता दिलाए । जगजितले दायाँ विंगबाट दिएको क्रसलाई जिलेस्पीले हेडरमार्फत गोल गरेका थिए ।

खेलको २५ औं मिनेटमा तिन डिफेन्डरलाइ बिट गर्दै सातदोबाटोका दिपक राज सिंह ठकुरीले गरेको प्रहार आर्मीका सुरज बस्नेतलाई लाग्दै गोलमा परिणत भयो । गोलरक्षक अभिषेक बरालले दिएको लामो पास रोक्ने क्रममा सुरजले सन्तुलन गुमाएपछि दिपकले त्यसको फाइदा उठाए । पेनाल्टी क्षेत्रभित्र प्रवेश गरेपछि दिपकको प्रहार सुरजलाई लाग्दा गोलरक्षक विकेश कुथु बिट भएका थिए ।

खेलको ३८ औं मिनेटमा जिलेसपीले नै व्यक्तीगत दोस्रो गोल गर्दै आर्मीलाई पुनः अग्रता दिलाए । सातदोबाटोका डिफेन्डर पासाङ लामाले ६ यार्ड बक्स अगाडिबाट क्लियर गरेको बल जिलेस्पीले रोक्न खोज्दा गोल भएको थियो ।

दोस्रो हाफको सुरुवातमै सातदोबाटो बराबरी गोल गर्दै खेलमा फर्कियो । ४८ औं मिनेटमा निरज चौधरीको क्रस गोलरक्षक विकेश कुथुले नियन्त्रणमा लिन नसक्दा सार्दोर्बेक मात्मुरातोभले गोल गरेका थिए । विकेशले फुस्काएको बल सिधै मात्मुरातोभको खुट्टामा पुगेपछि उनले पहिलो टचमै फिनिस गरे ।

बराबरी गोलको ४ मिनेटपछि नै आर्मीले पुन: अग्रता लियो । दायाँ विंगबाट दीपक गुरुङले दिएको क्रस सिधै गोल भएको थियो । दिपकको क्रस गोलरक्षक अभिषेक बरालले ठम्याउन नसक्दा बल ६ यार्ड बक्समा बाउन्स हुँदै टाउको माथिबाट गोल भएको थियो ।

७५ औं मिनेटमा जिलेस्पीको क्रसमा नवयुग श्रेष्ठको प्रहार बेन्चबाट मैदान प्रवेश गरेका गोलरक्षक निशान थापामगरले विफल पारे । ८५ औं मिनेटमा विलियम ओपोकुले ३० यार्ड टाढाबाट फ्रिकिकमा सिधै गोल गर्दै सातदोबाटोलाई खेलमा फर्काए । उनको शक्तिशाली प्रहार गोलरक्षक विकेशले बचाउने प्रयास गरेपनि उनको हातमा लाग्दै गोल भएको थियो ।

यसअघि आजै भएको खेलमा मच्छिन्द्र क्लबले संकटालाई तथा न्यु रोड टिम (एनआरटी) ले हिमालयन शेर्पा क्लबलाई समान २-१ ले पराजित गर्यो ।