एजेन्सी – सुरुवाती दुई गोलको अग्रता र बुकायो साकाले पेनाल्टी चुकाएपछि इंग्लिस प्रिमियर लिगको शीर्षस्थानमा रहेको आर्सनल बराबरीमा रोकिएको छ ।

आर्सनल घरेलु टोली वेस्ट ह्याम युनाइटेडसँग २–२ गोलको बराबरीमा रोकिएको हो । लन्डन स्टेडियम लन्डनमा आइतबार राति भएको खेलमा आर्सनलका गाब्रियल जेसस र मार्टिन ओडेगार्डले गोल गर्दा वेस्ट ह्यामका सेड मेनरहमा र जारोड वोवेनले बराबरी गोल फर्काए ।

खेलको सातौं मिनेटमा जेससले गोल गर्दै आर्सनलाई १–० को अग्रता दिलाए । उनले बेन ह्वाइटको पासमा गोल गर्न सफल भएको थिए । १०औं मिनेटमा कप्तान मार्टिन ओडेगार्डले गाब्रियल मार्टिनेलीको पासमा गोल गर्दै आर्सनलको अग्रता दोब्बर पारे ।

तर, त्यो अग्रतालाई आर्सनलले जोगाउन सकेन । ३३औं मिनेटमा सेड बेनरहमाले पेनाल्टीमा गोल गर्दै खेललाई २–१ को स्थितिमा ल्याए । ५२औं मिनेटमा आर्सनलले पेनाल्टी पाएपनि बुकायो साका चुक्दा आर्सनल अग्रता बढाउनबाट चुक्यो ।

त्यसको दुई मिनेटपछि जारोड बोवेनले गोल गर्दै गोल गर्दै खेललाई २–२ गोलको बराबरीमा ल्याए । उनले थिलो केहररको पासलाई सदुपयोग गरे । त्यसपछि थप गोल निस्कन नसक्दा खेल बराबरीमा टुंगियो ।

यस बराबरीसँगै आर्सनलले शीर्षस्थानमा ४ अंकको अग्रता बनाएको छ । आर्सनलको ३१ खेलबाट ७४ अंक पुगेको छ । एक खेल कम खेलेको म्यानचेस्टर सिटीको ७० अंक छ । वेस्ट ह्याम ३० खेलबाट ३१ अंक जोडेर १५औं स्थानमा छ ।