एजेन्सी – स्पेनिस ला लिगाको शीर्षस्थानमा रहेको क्याटलान क्लब बार्सिलोनाले अर्काे बराबरीको नतिजा निकालेको छ । घरेलु टोली गेटाफेले बार्सिलोनालाई गोलरहित बराबरीमा रोक्दै अंक खोस्न सफल भएको हो ।

कोलिसिअम अलफन्सो पेरेज स्टेडिय गेटाफेमा आइतबार राति भएको खेलमा बार्सिलोनाले बल पोसेसन राख्दै घरेलु टोलीमाथि लगातार दवाव सिर्जना गरेपनि गोल गर्न नसक्दा बराबरीमा रोकिन पुग्यो ।

पाँचौ मिनेटमा गेटाफेले गोल गर्ने सुवर्ण मौका खेर फाल्यो । २५औं मिनेटमा बार्सिलोनाको दुई प्रहार पोस्टमा लागेर फर्कदा बार्सिलोना अग्रता लिनबाट चुक्यो ।

गोलरक्षक मार्क आन्दर टेर स्टेगनको लामो पासमा राफिन्हाको प्रहार पोस्टमा लागेर फर्कदा रिवाउन्डमा एरिक बाल्डेको प्रहार पनि पोस्टमा लाग्द फर्कियो ।

पहिलो हाफको इन्ज्युरी समयको थप गरिएको दोस्रो मिनेटमा रोबर्ट लेवान्डोस्कीले दुई डिफेन्डरलाई बिट गर्दै गरेको प्रहारलाई गोलरक्षक डेभिड सोरियाले बचाए । ५४औं मिनेटमा फ्रान्क केसीको प्रहारमा पनि गोलरक्षक सोरिया नै बाधक बन्दा बार्सिलोना निराश हुन पुग्यो ।

७५औं मिनेटमा राफिन्हाको फ्रिकिक पनि सदुपयोग हुन सकेन । ८७औं मिनेटमा गेटाफे पुनः अग्रता लिनबाट चुक्यो । त्यसपछि पनि थप गोल निस्कन नसक्दा खेल बराबरीमा सकियो ।

यस बराबरीसँगै बार्सिलोना पछिल्लो तीन खेलमा जित र गोल गर्न असफल रह्यो । इल्चेलाई ४–० ले हराएपछि बार्सिलोनाले कोपा डेल रेमा रियल म्याड्रिडसँग ४–० को हार बेहोर्दा ला लिगामा जिरोनासँग गोलरहित बराबरी खेलेको थियो ।

यस बराबरीका बावजुत बार्सिलोनाले शीर्षस्थानमा ११ अंकको स्पष्ट अग्रता कायम गर्न सफल भएको छ । बार्सिलोनाको २९ खेलबाट ७३ अंक पुगेको छ । समान खेलबाटै रियलको ६२ अंक छ । गेटाफे ३१ अंक जोडेर १५औं स्थानमा छ ।