काठमाडौं (हाम्रो खेलकुद) – त्रिभुवन आर्मी फुटबल क्लबका विंगर जगजित श्रेष्ठ आफ्नो पूर्व क्लब मनाङ मर्स्याङ्दी क्लबविरुद्ध प्लेयर अफ द म्याच घोषित भएका छन् । उनले अवार्डसँगै १० हजार रुपैयाँ प्राप्त गरे ।

मंगलबार आर्मीले मनाङलाई १-० ले पराजित गर्दा जगजितले उत्कृष्ट खेल प्रदर्शन गरेका थिए । दोस्रो हाफमा उनले सिर्जना गरेको अवसरमा नै सुदिल राईले आर्मीका लागि निर्णायक गोल गरेका थिए । जगजितको फ्रिकिक पेनाल्टी क्षेत्रभित्र क्लियर गर्न नसक्दा सुदिलले रिबाउन्डलाई गोलमा परिणत गरेका थिए ।

त्यसअघि पनि जगजितले खेलमा आर्मीका लागि पटक पटक अवसर सिर्जना गरे । खेलको सुरुवातमा नै गोलरक्षकसँग टु भर्सेस वनको अवस्थामा उनले नवयुग श्रेष्ठलाई दिएको पास राष्ट्रिय टोलीका फरवार्डले सदुपयोग गर्न सकेका थिएनन् । जगजितले पेनाल्टी क्षेत्रभित्र आशिष श्रेष्ठबाट बल खोस्दै दिएको पासलाई नवयुगले ६ यार्ड बक्स भित्रबाट खाली पोस्टमा गोल गर्न सकेका थिएनन् ।

चोटका कारण लिगको सुरुवाती खेल गुमाएका जगजितले पछिल्लो केहि खेलमा भने राम्रो प्रभाव जमाएका छन् । मुख्यत: लेफ्ट विंगमा खेल्दै आएका उनले आर्मीको लागि अवसर सिर्जना गर्ने जिम्मेवारी निर्वाह गरेका छन् । प्रशिक्षक नविन न्यौपानेले पनि सन्तोष तामाङ पलायन भएपछि जगजितले नै आर्मीको लागि त्यो भूमिका निभाइरहेका छन् । उनले सेट पिसमा पनि उत्तिकै राम्रो अवसर सिर्जना गर्दै आएका छन् ।