सिलगुढी÷भारत (एजेन्सी)– भारतले लगातार चौथो पटक महिला साफ च्याम्पियनसिप फुटबलको उपाधि जितेको छ । सिलगुढीको कञ्चनजंगा रंगशालामा बंगलादेशलाई ३–१ ले हराउँदै भारतले उपाधि रक्षा गरेको हो । डाङमेइ ग्रेस, सुस्मिता मलिक र इन्दुुमतीले गोल गरेपछि भारतले जितको आधार तयार पारेको थियो ।
डाङमेइले १२ औं मिनेटमा गोल गर्दै भारतलाई अग्रता दिलाएपछि पहिलो हाफमै बंगलादेशकी सिरात जाहान सोप्नाले बराबरी गोल फर्काएकी थिइन् । तर ६० औं मिनेटमा सुस्मिता र ६७ औं मिनेटमा इन्दुमतीले गोल गर्दै भारतको जित पक्का गरे ।
बंगलादेश त्यहि टोली हो जसले भारतलाई समूह चरणमा गोलरहित बराबरीमा रोकेको थियो । तर, भारत फाइनल फेरी च्याम्पियनकै शैलीमा प्रस्तुत भयो र सफलता हासिल गर्यो ।
भारतले सेमिफाइनलमा नेपाललाई पनि ३–१ ले हराएको थियो । जसका कारण नेपाल ६ बर्षे साफ च्याम्पियनसिपको इतिहासमा पहिलो पटक फाइनल पुग्नबाट बञ्चित भएको थियो । यसपटक भारत चार खेलमै च्याम्पियन बनेको छ । समूह चरणमा बंगलादेशसँग बराबरीमा रोकिनुअघि भारतले अफगानिस्तानलाई ५–१ ले हराएको थियो ।
नेपाल समूह चरणमा दमदार प्रदर्शन गरेपनि फाइनल पुग्नबाट पनि असफल भयो । नेपालले समूह चरणमा भुटानलाई ८–०, माल्दिभ्सलाई ९–० र श्रीलंकालाई १–० ले हराएको थियो । भारतलाई सेमिफाइनलमा गोल गरेकी सावित्रा भण्डारीका लागि भने यो च्याम्पियनसिप यादगार रह्यो । उनले च्याम्प्यिनसिपमा १२ गोल गरेकी थिइन् ।
