काठमाडौं (हाम्रो खेलकुद) – अखिल नेपाल फुटबल संघ (एन्फा) को अनुशासन समितिले यस सिजनको सहिद स्मारक ए डिभिजन लिगमा अनुशासन उल्लंघन गरेको आरोपमा साविक विजेता मछिन्द्र फुटबल क्लबसहित चार क्लबलाई कारवाही र एपिएफका अफिसियललाई ८ खेलको निलम्बन गरेको छ ।

समितिले मछिन्द्र, संकटा क्लब, एफसी खुमलटार र नेपाल एपीएफ फुटबल क्लबसँगै एपिएफका अफिसियललाई विभिन्न खेलमा अनुशासन उल्लंघन गरेको भन्दै कारवाही गरेको एन्फाले जनाएको छ ।

समितिले संकटा, मछिन्द्र र खुमलटार क्लबलाई समान १० हजार रुपैयाँ तथा एपीएफलाई ५ हजार जरिवाना गरेको हो । यसैगरी एपीएफका अफिसियल जिवेश पाण्डेलाई ८ खेलको प्रतिबन्ध र १० हजार जरिवाना सुनाएको छ ।

समितिले अप्रिल १६ (म्याच ६०) मा एपीएफ फुटबल क्लबसँगको खेलमा ढिलाइ गरेको भन्दै समितिले संकटालाई १० हजार जरिवाना गरेको हो । गोलकिपरको जर्सीलाई लिएर भएको विवादले खेलको सुरुवात २६ मिनेट ढिलो गरी सुरु भएको थियो ।

सोही खेलको दोस्रो हाफ दुई मिनेट ढिलो गरेको भन्दै समितिले एपीएफ फुटबल क्लबलाई ५ हजार रुपैयाँ जरिवाना गरेको छ । एपीएफ क्लबका अधिकारी जिवेश पाण्डे पिचमा प्रवेश गरेपछि खेल ढिलो सुरु भएको थियो ।

यस्तै समितिले अप्रिल १९ (म्याच ६७) मा मछिन्द्रविरुद्धको खेल फोर्थ अफिसिलय ज्ञानबहादुर मोक्तानलाई हातपात गरेकोमा एपीएफका अफिसियल पाण्डेलाई पनि ८ खेलको निलम्बन र १० हजार रुपैयाँ जरिवाना गरेको छ ।

पाण्डेले खेलपछि फोर्थ अफिसियललाई हातपात गरेका थिए र फिफा डिसिप्लिन कोड च्याप्टर (२), दफा (१एल) बमोजिम कारबाही गरिएको एन्फाले जनाएको छ ।

समितिले गत अप्रिल ११ मा मच्छिन्द्र फुटबल क्लबसँगको खेलपछि ड्रेसिङ रुममा रहेका कुर्सी तोडफोड गरेको भन्दै एफसी खुमलटारलाई १० हजार जरिवाना समेत गरेको छ । च्यासल रंगशालामा भएको खेलमा खुमलटार डिफेन्डिङ च्याम्पियनसँग ७–३ ले पराजित भएको थियो ।
यस्तै अप्रिल १५ (म्याच ५८) मा न्युरोड टिम (एनआरटी) सँगको खेलपछि रेफ्रीमाथि आक्रमण गर्ने प्रयास गरेको आरोपमा मछिन्द्रलाई पनि १० हजार जरिवाना पनि गरिएको छ । एनआरटीसँगको खेल १–१ गोलको बराबरीमा सकिएको थियो ।