काठमाडौं (हाम्रो खेलकुद)– सहिद स्मारक ए डिभजन लिग जेठ २७ सम्पन्न गर्ने गरि अखिल नेपाल फुटबल संघ (एन्फा) ले बिहीबार खेल तालिका सार्वजनिक गरेको छ ।

१३ औं चरणको खेल सुरु हुने दिन एन्फाले १४ औं देखि २६ औं तथा अन्तिम चरणको खेल तालिका सार्वजनिक गरेको हो । वैशाख १७ गते मछिन्द्र क्लब र सातदोबाटो युथ क्लबबीचको प्रतिस्पर्धासँगै १३ औं चरणका खेल सकिनेछन् । एक दिनको विश्रामपछि वैशाख १९ बाट पुनः लिग सुरु हुने तालिका रहेको छ ।

१३ औं चरणको समाप्तीमा अंक तालिकाको शीर्षस्थानमा रहने र पुछारमा रहने टोलीबीच १४ औं चरणको पहिलो खेल वैशाख १९ गते एन्फा कम्प्लेक्समा हुने खेल तालिकामा उल्लेख छ । लिगको अन्तिम दिन जेठ २७ गते अन्तिम खेल १३ औं चरणको समाप्तीमा शीर्ष र दोस्रो स्थानमा रहेका टोलीबीच दशरथ रंगशालामा प्रतिस्पर्धा हुनेछ ।

फागुन १९ गते एफसी खुमलटार र फ्रेन्ड्सबीचको प्रतिस्पर्धासँगै यसपटकको लिगको सुरुवात भएको थियो ।१२ औं चरणको समाप्तीमा जावालखेल युथ क्लब २३ अंकका साथ शीर्षस्थानमा, थ्री स्टार क्लब (२२ अंक) दोस्रो, सातदोबाटो युथ क्लब (२१) तेस्रो र १९ अंकसहित त्रिभुवन आर्मी फुटबल क्लब चौथो स्थानमा छ ।

न्यूरोड टिम एनआरटी, खुमलटार र हिमालयन शेर्पाको समान १३ अंक छ । हिमालयन शेर्पा १३ औं र ९ अंक जोडेको नेपाल पुलिस क्लब पुछारमा रहेको छ । पहिलो लेगमा जस्तै दशरथ रंगशालासहित च्यासल र एन्फा कम्प्लेक्सको मैदानमा खेलहरु हुने एन्फाले जनाएको छ ।

सहिद स्मारक ए डिभिजन लिगको दोस्रो लेगको खेल तालिका