एजेन्सी – सुरुवाती दुई गोलको अग्रता जोगाउन नसक्दा म्यानचेस्टर युनाइटेड इंग्लिस प्रिमियर लिगमा टोटेनहम हटस्परसँग बराबरीमा रोकिएको छ ।

युनाइटेड घरेलु टोली टोटेनहमसँग २–२ गोलको बराबरीमा रोकिएको हो । युनाइटेडका जेडान सान्चो र मार्कस रासफर्डले गोल गर्दा टोटेनहमका पेड्रो पोरो र ह्युङ मिन सनले बराबरी गोल फर्काए ।

टोटेनहम हटस्पर स्टेडियम लन्डनमा बिहीबार राति भएको खेलको सातौं मिनेटमा सान्चोको गोलबाट युनाइटेडले १–० को अग्रता लिन सफल भएको थियो । उनले मार्कस रासफर्डको पासमा गोल गर्न सफल भएका थिए ।

४४औं मिनेटमा रासफर्डले ब्रुनो फर्नान्डेसको पासमा गोल गर्दै युनाइटेडलाई पहिलो हाफमा २–० को अग्रता दिलाए । तर, युनाइटेडले त्यो दुई गोलको अग्रतालाई दोस्रो हाफमा जोगाउन सकेन ।

५६औं मिनेटमा पेड्रो पोरोले गोल गर्दै घरेलु टोली टोटेनहमलाई खेलमा फर्कने संकेत दिए । ७९औं मिनेटमा कप्तान ह्यारी केनको पासमा सनले गोल गर्दै युनाइटेडलाई जितबाट वञ्चित गराए ।

यस बराबरीसँगै युनाइटेड ३१ खेलबाट ६० अंक जोडेर चौथो स्थानमा यथावत छ । टोटेनहम ३३ खेलबाट ५४ अंक जोडेर पाँचौं स्थानमा छ ।

प्रिमियर लिगकै अर्काे खेलमा न्यूक्यासल युनाइटेडले एभर्टनलाई ४–१ ले पराजित गरेको छ । न्यूक्यासलको जितमा कलुम व्लिसनले दुई तथा जोइलिन्टन र ज्याकव मर्फीले समान एक गोल गरे । घरेलु टोली एभर्टनका ड्वाइट म्याक्नेलले एक गोल फर्काए ।

यस जितसँगै न्यूक्यासल ३२ खेलबाट ६२ अंक जोडेर तेस्रो स्थानमा रहेको छ । पराजित एभर्टन ३३ खेलबाट २८ अंक जोडेर १९औं स्थानमा छ ।

अर्काे खेलमा मार्कस टाभेनिएरको निर्णायक गोलमा बर्नमाउथले साउथह्याम्टनलाई १–० ले पराजित गरेको छ ।