एजेन्सी – इंग्लिस क्लब चेल्सीमा खराब नतिजा कायम गरेपनि अन्तरिम प्रशिक्षक फ्रान्क लाम्पार्ड सिजनको अन्त्यसम्म क्लबमै रहने भएका छन् ।

लगातार खराव नतिजा आत्मसात् गरेपनि सिजनको अन्त्यसम्म स्टामफोर्ड ब्रिजको डगआउटमा अब कुनै परिवर्तन नहुने क्लबले पुष्टि गरेको छ । ‘खराब नतिजाको बाबजुद पनि सिजनको अन्त्यसम्म फ्रान्क लाम्पार्डले चेल्सीको अन्तरिम प्रशिक्षक रहनेछन् ।’ क्लबले भनेको छ ।

चेल्सीका पुर्व मिडफिल्डर तथा प्रशिक्षक फर्किएदेखि चेल्सीले लगातार पाँच खेलमा हार बेहोरिसकेको छ । पछिल्लोपटक चेल्सी प्रिमियर लिगमा घरेलु मैदानमै ब्रेन्टफर्डसँग २–० ले पराजित भएको थियो ।

चेल्सीले नयाँ सिजनदेखि मौरिसियो पोचेटिनोलाई मुख्य प्रशिक्षक बनाउने तयारी गरिरहेको छ । पोचेटिनो र चेल्सीका अध्यक्ष टोड बोहलीबीच लगातार छलफल भइरहेको छ ।

चेल्सीले ११ मार्चमा लेस्टर सिटीलाई हराएयता जित निकाल्न सकेको छैन । लेस्टरलाई हराउने बेला ग्राहम पोटर प्रशिक्षक थिए । त्यसको दुई खेलपछि पोटर बर्खास्तीमा परेका थिए । एक खेलमा ब्रुनो साल्टोरले चेल्सीको प्रशिक्षक सम्हालेका थिए ।

चेल्सी यो सिजन च्याम्पियन्स लिगबाट बाहिरिसकेको छ । प्रिमियर लिगमा पनि चेल्सी शीर्ष चारको म्यानचेस्टर युनाइटेडभन्दा २१ अंकले पछि छ ।