एजेन्सी – लन्डन क्लब आर्सनललाई पछि पार्दै म्यानचेस्टर सिटी इंग्लिस प्रिमियर लिगको शीर्षस्थानमा उक्लन सफल भएको छ ।

प्रिमियर लिग अन्तरगत आइतबार राति घरेलु टोली फुलहमलाई २–१ ले पराजित गरेपछि सिटीले आर्सनललाइृ पछि पार्दै शीर्षस्थानमा उक्लन सफल भएको हो ।

क्राभेन कटेज लन्डनमा सिटीको जितमा एर्लिङ ब्राउट हालान्ड र जुलियन अल्भारेजले गोल गरे । घरेलु टोली फुलहमका भिनिसियले एक गोल फर्काए ।

खेलको तेस्रो मिनेटमा नै हालान्डको पेनाल्टी गोलबाट सिटीले अग्रता बनाएको थियो । टिम रिमले पेनाल्टी बक्समा अल्भारेजलाई फउल गरेपछि प्राप्त पेनाल्टीमा हालान्डले कुनै गल्ती गरेनन् । जारी सिजनमा उनको यो ५०औं गोल हो ।

१५औं मिनेटमा भिनिसियसले गोल गर्दै खेललाई १–१ गोलको बराबरीमा ल्याए । उनले ह्यारी विल्सनको पासमा गोल गर्न सफल भएका थिए । ३६औं मिनेटमा अल्भारेजले रियाद महारेजको पासमा गोल गर्दै सिटीलाई पुनः २–१ को अग्रता दिलाए ।

दोस्रो हाफमा पनि सिटीले घरेलु टोलीलाई दवावमा राखेपनि थप गोल गर्न नसक्दा पहिलो हाफको नतिजा नै सिटीको जितमा पर्याप्त बन्यो ।

यस जितसँगै शीर्षस्थानमा उक्लिएको सिटीले आर्सनललाई १ अंकले पछि पारेको छ । सिटीको ३२ खेलबाट ७६ अंक पुगेको छ ।

सिटीले अझैपनि एक खेल कम खेलेको छ । ३३ खेल खेलेको आर्सनलको ७५ अंक छ । पराजि तफुलहम ३३ खेलबाट ४५ अंक जोडेर १०औं स्थानमा छ ।