काठमाडौं (हाम्रो खेलकुद) – लेवनानका फरवार्ड युसुफ अथ्रिसले इन्ज्युरी समयमा पेनाल्टीमार्फत गोल गर्दा संकटा क्लब सहिद स्मारक ए डिभिजन लिगमा त्रिभुवन आर्मी फुटबल क्लबसँग हारबाट जोगिएको छ ।

एन्फा कम्प्लेक्समा आइतबार सम्पन्न खेलमा संकटाले आर्मीलाई १-१ को बराबरीमा रोक्दै रेलिगेसन क्षेत्र छाड्यो । आर्मीले कप्तान भरत खवासको गोलमा पहिलो हाफमा अग्रता लिएपनि अन्तिम समयमा गोल खाँदा अंक बाँडेको हो । आर्मी यस बराबरीसँगै १५ खेलमा २१ अंक जोड्दै छैटौं स्थानमा छ । यता संकटा १५ खेलमा १७ अंकका साथ दशौं स्थानमा उक्लिएको छ ।

खेलको १८ औं मिनेटमा कप्तान भरत खवासले आर्मीलाई अग्रता दिलाएका थिए । जिलेस्पी जंग कार्कीको पासलाई उनले पेनाल्टी क्षेत्रभित्र लग्दै गोल गरेका थिए । तर दोस्रो हाफको इन्ज्युरी समयमा गोल खाएपछि आर्मी जितबाट बन्चित भयो ।

इन्ज्युरी समयको चौथो मिनेटमा भरत चौधरीले जुनिअर एन्कुंगेलाई फल गरेपछि रेफ्री प्रज्वल क्षेत्रीले पेनाल्टी दिए । अथ्रिसले पेनाल्टीमा गोल गर्दै संकटालाई हारबाट जोगाए । अथ्रिसले सिजनको पहिलो गोल पनि गरे ।

त्यसअघि दिनको अर्को खेलमा मच्छिन्द्रका ओलावाले आफिजले इन्ज्युरी समयमा गोल गर्दा एपीएफ २-१ ले पराजित भयो ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिट लगायत सम्पूर्ण जानकारीका लागि यहाँ थिच्नुहोस ।