काठमाडौं (हाम्रो खेलकुद) – चार खेलको जितविहिन यात्रामा पूर्णविराम लगाउँदै जावलाखेल युवा क्लब सहिद स्मारक ए डिभिजन लिग २०७९ को शीर्षस्थानमा उक्लिएको छ ।

दशरथ रंगशालामा मंगलबार जावलाखेलले हिमालयन शेर्पा क्लबलाई १-० ले पराजित गर्यो । पहिलो हाफको आत्मघाती गोल नै जावलाखेलको जितमा निर्णायक सावित भयो । यस जितसँगै जावलाखेल १६ खेलमा २७ अंकका साथ शीर्षस्थानमा उक्लियो । एक खेल कम खेलेको चर्च ब्वाइजको २७ अंक नै भएपनि हेड टु हेडमा जावलाखेल अघि छ । शेर्पा भने १६ खेलमा २० अंकका साथ अंक तालिकाको मध्य भागमा छ ।

खेलको चौथो मिनेटमा हिसुब थपलियाको प्रहार बाहिरिँदा जावलाखेलले अग्रता लिने अवसर गुमायो । पेनाल्टी क्षेत्र बाहिरबाट बल अघि बढाउँदै ६ यार्ड बक्स भित्रबाट कठिन एंगलबाट गरेको प्रहार पोस्टभन्दा थोरैले बाहिरियो । २४ औं मिनेटमा जावलाखेलले आत्मघाती गोलमा अग्रता लियो । अब्दुलअजिज निशानबाएभको कर्नर गोलरक्षक किशोर गिरीले पन्च नभेट्दा अमृत श्रेष्ठको कम्मरमुनि लाग्दै गोल भयो ।

५३ औं मिनेटमा हिसुबको प्रहार गोलरक्षक किशोर गिरीले बचाएपनि रिबाउन्डमा आएको बललाई हिसुबले पुन: पोस्टको दिशा दिन सकेनन् । ५५ औं मिनेटमा निशानबाएभको प्रहार पोस्ट नजिकबाट बाहिर गयो ।

५८ औं मिनेटमा हिसुबको पासमा फोडे फोफानाको प्रहार गोलरक्षक किशोरले बचाए । इन्ज्युरी समयमा हिसुबकै प्रहार पोस्टभन्दा माथिबाट जाँदा जावलाखेल अग्रता दोब्बर पार्नबाट बन्चित भयो ।

त्यसअघि दिउँसो दशरथ रंगशालामै भएको खेलमा एनआरटी र थ्री स्टारले गोलरहित बराबरी खेले । च्यासल मैदानमा लेबनानी फरवार्ड युसेफ अथ्रिसको दुई गोलमा संकटाले सातदोबाटोलाई हरायो ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिट लगायत सम्पूर्ण जानकारीका लागि यहाँ थिच्नुहोस ।