काठमाडौं (हाम्रो खेलकुद)– नेपाली राष्ट्रिय महिला टोलीका खेलाडी एकअर्काविरुद्ध उत्रिएको भारतीय महिला लिग (आईडब्ल्यूएल) मा बुधबारको खेल बराबरीमा टुंगिएको छ ।

राष्ट्रिय टोलीकी कप्तान तथा गोलकिपर एन्जिला तुम्बापो सुब्बा आबद्ध सेथु र राष्ट्रिय टोलीका मिडफिल्डरद्वय सरु लिम्बु र रेनुका नगरकोटे आबद्ध किकस्टार्ट एफसी कर्नाटकबीचको खेल गोलरहित बराबरीमा सकिएको थियो । पहिलो रोजाईमा खेलका एन्जिला र सुरुले पूरा समय खेलेका थिए । रेनुका भने ८१ औं मिनेटमा कोइको एलिजावेथ काटुङवाको ठाँउमा मैदान प्रवेश गरेकी थिइन् ।

समूह बीमा रहेका सेथु र किकस्टार्ट दुवैको जारी लिगमा पहिलो बराबरी हो । सेथले ६ खेलमा १६ अंकसहित शीर्षस्थानमा छ भने किकस्टार्ट १३ अंकसहित तेस्रो स्थानमा छ । १५ अंकका साथ उडिसा एफसी तेस्रो स्थानमा छ । बुधबार नै भएको अर्को खेलमा नेपाली राष्ट्रिय टोलीकी मिडफिल्डर अनिता बस्नेत आबद्ध लर्डस् एफ ए कोची पराजित भएको छ । चर्चिल ब्रदर्श एफसीसँग लर्डस् एफए ३–१ ले हराएको थियो । अनिता पहिलो रोजाईमा खेलेकी थिइन् ।

समान ३ अंकरहेका लर्डस् समूह बीको अंकतालिकाको छैटौं र चर्चिल सातौं स्थानमा छ । समूह एमा अपराजित रहेको गोकुलम केरोला एफसी १६ अंकसहित शीर्षस्थानमा छ । गोकुलमबाट खेलिरहेकी राष्ट्रिय टोलीकी फरवार्ड सावित्रा भण्डारी साम्बाले १९ गोल गरिसकेकी छिन् ।