काठमाडौं (हाम्रो खेलकुद) – विभागीय टोली नेपाल पुलिस क्लबले सहिद स्मारक ए डिभिजन लिग २०७९ मा रेलिगेसन क्षेत्र छाडेको छ । दशरथ रंगशालामा शुक्रबार संकटा क्लबलाई २-१ ले हराउँदै पुलिस अंक तालिकामा पुछारको स्थान छोड्न सफल रहयो ।

पुलिसको जितमा दुवै गोल विदेशी खेलाडीले गरे । मोजेस ग्याबा र मोहमद आशिकले पुलिसका लागि गोल गर्दा संकटाका निशान खड्काले फ्रिकिकमार्फत बराबर गरेका थिए ।

यस जितसँगै पुलिस ११ औं स्थानमा उक्लिएको छ । पुलिसको १७ खेलमा ५ जित, ४ बराबरी र ८ हारसहित १९ अंक छ । संकटा १७ खेलमा ५ जित, ५ बराबरी र ७ हारसहित २० अंकका साथ दशौं स्थानमा छ ।

खेलको सातौं मिनेटमा नै पुलिसले अग्रता लियो । मोजेस र अहमद हिजाजीले एक अर्कासँग पास साटफेर गर्दै राम्रो मुभ सिर्जना गरे । पेनाल्टी क्षेत्रको दायाँ भागबाट हिजाजीले दिएको क्रसमा मोजेसले हेडरमार्फत गोल गरेका थिए ।

२४ औं मिनेटमा संकटा बराबरी गोल गर्न सफल भयो । निशान खड्काले पेनाल्टी क्षेत्र बाहिरबाट दोस्रो बार च्यापेर प्रहार गरेको फ्रिकिक टप कर्नरमा गोल भएको थियो ।

७९ औं मिनेटमा पुलिसले पुन: अग्रता लियो । बेन्चबाट मैदान पसेको ७ मिनेटमा नै आशिकले गोल गरे । उनको पहिलो प्रहार पोस्टमा लागेर फर्केपछि डिफेन्डर र गोलरक्षकको बीचबाट उनले रिबाउन्डमा गोल गरे । इन्ज्युरी समयमा मोजेसको शक्तिशाली प्रहार संकटाको गोलरक्षक टिकेन्द्र थापाले विफल पार्दै स्कोर २-१ मा सिमित राखे । लगत्तै अर्को तर्फ पुलिसका गोलरक्षक शत्रुघन चौधरीले संकटाका जुनियर एन्कुंगेको प्रहार जोगाउँदै जित पक्का गरे ।

दशरथ रंगशालामा आज साँझ ६ बजे हुने दोस्रो खेलमा फुटबल क्लब खुमलटार र न्यु रोड टिम (एनआरटी) खेल्नेछन् ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिट लगायत सम्पूर्ण जानकारीका लागि यहाँ थिच्नुहोस ।