अग्रता जोगाउन नसक्दा मनाङ रोकियो

काठमाडौं (हाम्रो खेलकुद) – सुरुवाती अग्रता जोगाउन नसक्दा मनाङ–मर्स्याङ्दी क्लब सहिद स्मारक ‘ए’ डिभिजन लिगमा बराबरीमा रोकिएको छ ।

मनाङ हिमालयन शेर्पा क्लबसँग १–१ गोलको बराबरीमा रोकिएको हो । एन्फा कम्प्लेक्समा शुक्रबार भएको खेलमा मनाङका निरन्जन धामीले गोल गर्दा शेर्पाका एबायोमी फकुन्लेले बराबरी गोल फर्काए ।

खेलको १३औं मिनेटमा निरन्जन धामीको गोलबाट मनाङले १–० को अग्रता लिन सफल भएको थियो । तर, त्यो अग्रतालाई मनाङले पहिलो हाफमै जोगाउन सकेन ।

३५औं मिनेटमा एबायोमी फकुन्लेले गोल गर्दै खेललाई १–१ गोलको बराबरीमा ल्याए । दोस्रो हाफमा दुवै टोलीबाट गोल निस्कन नसक्दा खेल बराबरीमा सकियो । यि दुई टोलीले पहिलो राउन्डमा पनि १–१ गोलको बराबरी खेलेका थिए ।

पछिल्लो चार खेलमा अपराजित रहेको मनाङको यो लगातार तेस्रो बराबरी हो । चर्च ब्वाइजसँग ३–० को हारपछि अपराजित रहेको मनाङले आर्मीलाई पराजित गर्दा पुलिस र सातदोबाटोसँग बराबरी खेलेको थियो ।

यस बराबरीसँगै मनाङ १७ खेलबाट ५ जित, ६ बराबरी र ६ हारसँगै २१ अंक जोडेर सातौं स्थानमा उक्लिएको छ । एक खेल कम खेलेको आर्मीसँग समान अंक भएपनि हेड टु हेडमा अघि छ । २१ अंक नै रहेपनि गोल अन्तरमा शेर्पा नवौं स्थानमा छ ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिट लगायत सम्पूर्ण जानकारीका लागि यहाँ थिच्नुहोस ।