काठमाडौं (हाम्रो खेलकुद) – सहिद स्मारक ए डिभिजन लिगमा मंगलबार तीन खेल हुँदैछ । दिउँसो ३ बजे च्यासल मैदानमा पुलिस र एपिएफ भिड्दा दशरथ रंगशालामा शीर्ष ६ मध्य ४ टोली खेल्नेछन् ।

च्यासल मैदानमा पुलिस र एपिएफ भिड्दा पुलिससँग जारी लिगकै उच्च स्थानमा उक्लने अवसर हुनेछ । पहिलो लेगमा च्यासल मैदानमा नै एपिएफले २-० को जित दर्ता गरेको थियो । एपिएफले पछिल्लो तीन मध्य २ खेलमा हार बेहोरेको छ ।

पुलिस भने विदेशी खेलाडीको आगमनपछि निकै बलियो देखिएको छ । पछिल्लो ५ मध्य ३ खेलमा जित हासिल गरेको पुलिस सोहि लयलाई निरन्तरता दिन चाहन्छ । संकटाविरुद्ध २-१ को जितपछि रेलिगेसन क्षेत्रबाट निक्लेको पुलिसले आज ३ गोलको अन्तरले जिते एपिएफलाई पनि उछिन्नेछ ।

दिउँसो ३ बजे नै दशरथ रंगशालामा थ्री स्टार ए त्रिभुवन आर्मी फुटबल क्लब खेल्नेछन् । पहिलो लेगमा थ्री स्टारले १-० को जित दर्ता गरेको थियो । आर्मीले पछिल्लो खेलमा चर्च ब्वाइजलाई पराजित गर्दै लिगको उपाधि होडमा आफ्नो सम्भावना कायम राखेको छ । थ्री स्टारलाई पराजित गरे आर्मी लिगको चौथो स्थानमा उक्लनेछ ।

यता थ्री स्टार खराब लयलाई पूर्णविराम लगाउन चाहन्छ । पछिल्लो ६ खेलमा विना जित ४ बराबरी निकालेको थ्री स्टार चोटका कारण समस्यामा छ । मिडफिल्डमा लगातार परिवर्तन गरेको टोली आर्मीलाई हराएर तेस्रो स्थानमा उक्लने लक्ष्यमा हुनेछ ।

साँझ ६ बजे चर्च ब्वाइज युनाइटेड र सातदोबाटो युवा क्लब दशरथ रंगशालामा भिड्नेछन् । यस खेलमा जित हासिल गरे चर्च ब्वाइजले लिगको शीर्षस्थानमा २ अंकको अग्रता लिनेछ । तर कप्तान अनन्त तामाङ, मिडफिल्डर जोस्पे बेम्पा र डिफेन्डर सविन खड्का प्रतिबन्धका कारण टोलीमा छैनन् ।

सातदोबाटोले ४ खेलको जितविहीन यात्रालाई पूर्णविराम लगाउँदै पछिल्लो खेलमा एपिएफलाई हराएको थियो । दिपक राज सिंह ठकुरीको उच्च प्रदर्शनमा जित हासिल गरेको टोलीको आशा उनीमाथि हुनेछ । दिपक सर्वाधिक गोलकर्ता सुचिमा १२ गोल गर्दै शीर्ष स्थानका मेसुके ओलोमोउ भन्दा १ गोलले पछि छन् ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिटलगायत सम्पूर्ण जानकारीका लागि यहाँ थिच्नुहोस ।