काठमाडौं (हाम्रो खेलकुद) – नेपालले कुवेतविरुद्ध खेल्दै दक्षिण एसियाली फुटबलको सबैभन्दा प्रतिष्ठित प्रतियोगिता साफ च्याम्पियनसिपको सुरुवात गर्ने भएको छ । असार ६ गते भारतको बैंगलुरुमा सुरु हुने प्रतियोगिताको पहिलो दिन नेपालले कुवेतको सामना गर्नेछ ।

भारतको नयाँ दिल्लीमा बुधबार भएको समूह विभाजनपछि जारी गरिएको खेलतालिकामा नेपालले दोस्रो खेल आयोजक भारत र तेस्रो खेल पाकिस्तानसँग खेल्नेछ । नेपालले साविक विजेता समेत रहेको भारतसँग असार ९ गते प्रतिस्पर्धा गर्नेछ । त्यस्तै समूह चरणको अन्तिम खेल नेपालले पाकिस्तानसँग असार १२ गते खेल्नेछ ।

समूह बीमा अर्को नयाँ टोली लेबनान, माल्दिभ्स, भुटान र बंगलादेश रहेका छन् । नेपाल अघिल्लो संस्करणको फाइनलमा पुगेको थियो । माल्दिभ्समा भएको त्यति बेलाको च्याम्पियनसिपको फाइनलमा नेपाल भारतसँग पराजित भएको थियो । साफ च्याम्पिनसिपको इतिहासमा नेपाल एक पटक मात्र फाइनलमा पुग्न सफल भएको थियो ।

यसपटक दक्षिण एसियाबाहिरका दुई राष्ट्रले साफ च्याम्पियनसिपमा प्रतिस्पर्धा गर्दैछन् । दक्षिण एसियालका ७ मध्ये ६ राष्ट्रको सहभागिता साफ च्याम्पियनसिपमा रहनेछ । श्रीलंका भने फिफाबाट प्रतिबन्धका कारण सहभागिता जनाउने छैन ।

सहिद स्मारक ए डिभिजन लिग जेठ २७ गते सकिने अखिल नेपाल फुटबल संघ (एन्फा) ले तालिका बनाएको छ । लिगकै विश्रामको दिन रणनीतिक तयारी गरिरहेको नेपालले लिग सकिएको केहि दिनमै साफ च्याम्पियसिप खेल्नुपर्नेछ ।