दुई गोलको अग्रता जोगाउन नसक्दा मनाङ रोकियो

काठमाडौं (हाम्रो खेलकुद) – खेलमा दुईपटक अग्रता लिएपनि त्यसलाई जोगाउन नसक्दा मनाङ–मर्स्याङ्दी क्लब सहिद स्मारक ‘ए’ डिभिजन लिगमा बराबरीमा रोकिएको छ ।

मनाङले संकटा क्लबसँग २–२ गोलको बराबरी खेलेको हो । मनाङका लागि दुवै गोल कोफी कोउडुले गर्दा संकटाका युसेफ एट्रिस र मनिष डाँगीले बराबरी गोल फर्काए ।

खेलको १९औं मिनेटमा कोफीले गोल गर्दै मनाङलाई १–० को अग्रता दिलाए । ४४औं मिनेटमा युसेफ एट्रिसले गोल गर्दै खेललाई १–१ गोेलको बराबरीमा ल्याए ।

त्यसको एक मिनेटपछि नै कोफी कोउडुले व्यक्तिगत र टोलीका लागि दोस्रो गोल गरेपछि मनाङले पहिलो हाफमा २–१ को अग्रता लिन सफल भयो । तर, त्यो अग्रतालाई मनाङले दोस्रो हाफमा जोगाउन सकेन ।

५२औं मिनेटमा मनिष डाँगीले गोल गर्दै खेललाई २–२ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा सकियो । पहिलो राउन्डमा मनाङ १–० ले विजयी भएको थियो । त्यसबेला साहिदजमोल दभ्लातजोनोभले गोल गरेका थिए ।

पछिल्लो ५ खेलमा मनाङको यो पाँचौ बराबरीमा हो । आर्मीले १–० ले पराजित गरेयता अपराजित रहेको मनाङले जित निकाल्न सकेको छैन । यस बराबरीसँगै १९ खेलबाट २३ अंक जोडेको मनाङ सातौं स्थानमा छ । संकटा २२ अंक जोडेर आठौं स्थानमा छ ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिटलगायत सम्पूर्ण जानकारीका लागि यहाँ थिच्नुहोस ।