एजेन्सी – १० खेलाडीमा समेटिएको घरेलु टोली अग्सवर्गलाई पराजित गर्दै बोरुसिया डर्टमुन्ड जर्मन बुन्डेसलिगाको शीर्षस्थानमा उक्लिएको छ ।

अग्सवर्गलाई ३–० ले पराजित गर्दै डर्टमुन्ड बुन्डेसलिगाको उपाधिबाट एक जित टाढा छ । डर्टमुन्डले बायर्न म्युनिखलाई २ अंकले पछि पारेको छ । बायर्न आरबी लाइपजिगसँग ३–१ ले पराजित भएपछि आफ्नो शीर्षता गुमाउन पुगेको थियो ।

डब्लुडब्लुके एरिना अग्सवर्गमा घरेलु टोली खेलको ३८औं मिनेटमा १० खेलाडीमा समेटिन पुगेको थियो । फेलिक्स उदुओखाई सिधै रातो कार्ड खाँदै मैदानबाट बाहिरिएपछि त्यसको फाइदा डर्टमुन्डले उठाउन सफल भयो ।

५८औं मिनेटमा सेबास्टियन हलरले गोल गर्दै डर्टमुन्डलाई सुरुवाती अग्रता दिलाए । हलरले नै ८४औं मिनेटमा गोल गर्दै डर्टमुन्डलाई जिततर्फ अघि बढाए । इन्ज्युरी समयको थप गरिएको तेस्रो मिनेटमा जुलियन ब्रान्डले गोल गर्दै डर्टमुन्डको जित पक्का गरे ।

डर्टमुन्ड २०११–१२ पछि पहिलो पटक बुन्डेसलिगा जित्ने बलियो स्थितिमा छ । अब डर्टमुन्डले अन्तिम खेलमा माइन्जसँग २७ मार्चमा खेल्नेछ । यस खेलमा जित जित निकालेमा डर्टमुन्ड च्याम्पियन बन्नेछ ।

अर्काे खेलमा बायर्न म्युनिखले कोल्नसँग अंक गुमाएको खण्डमा डर्टमुन्डलाई बराबरीको नतिजा पनि च्याम्पियन बन्न पर्याप्त हुनेछ ।

शीर्षस्थानमा उक्लिएको डर्टमुन्डको ३३ खेलबाट ७० अंक पुगेको छ । समान खेलबाटै बायर्नको ६८ अंक छ । अग्सवर्ग ३४ अंक जोडेर १४औं स्थानमा छ ।