एजेन्सी – अन्तिम म्याच डेमा शीर्षस्थानमा रहेको बोरुसिया डर्टमुन्डलाई पछि पार्दै बायर्न म्युनिख लगातार ११औं सिजन जर्मन बुन्डेसलिगाको च्याम्पियन बन्न सफल भएको छ ।

शीर्षस्थानमा रहेको बोरुसिया डर्टमुन्ड बराबरीमा रोकिदा बायर्नले आफ्नो अन्तिम खेलमा एफसी कोल्नलाई २–१ ले पराजित गरेपछि बायर्न च्याम्पियन बन्न सफल भएको हो ।

समान ३४ खेलबाट ७१ अंक जोडेपनि गोल अन्तरमा बायर्नले डर्टमुन्डलाई पछि पार्दै लगातार ११औं सिजन उपाधि जित्न सफल भएको हो । यता, अन्तिम खेलमा बराबरीमा रोकिन पुग्दा डर्टमुन्डको सन् २०११–१२ पछि उपाधि जित्ने सपना सकिएको छ ।

कोल्नमा शनिबार राति भएको खेलमा बायर्नको जितमा किङ्सले कोमान र जमल मुसिएलाले गोल गरे । कोल्नका डिजानले एक गोल फर्काए । खेलको आठौं मिनेटमा कोमानको गोलबाट बायर्नले अग्रता लिन सफल भएको थियो । उनले लिरोए सानेको पासमा गोल गर्न सफल भएका थिए ।

४५औं मिनेटमा सानेले गोल गरेपनि भिएआरबाट मान्यता पाएन । ८०औं मिनेटमा डिजानले पेनाल्टीमा गोल गर्दै खेललाई १–१ गोलको बराबरीमा ल्याए । ८९औं मिनेटमा जमल मुसिएलाले गोल गर्दै बायर्नको जित पक्का गर्दै टोलीलाई च्याम्पियन बनाए ।यस जितले बायर्नले ३४ खेलबाट ७१ अंक बटुल्यो । पराजित कोल्न ४२ अंक जोडेर ११औं स्थानमा रह्यो ।

बुन्डेसलिगाकै अर्काे खेलमा दुई गोलले पछि परेको डर्टमुन्डले खेलमा फर्कदै माइन्जलाई २–२ गोलको बराबरीमा रोकेपनि च्याम्पियन बन्न पर्याप्त रहेन ।

माइन्जका एन्ड्रिएस हान्चे ओल्सेन र करिम ओनिसिओले गोल गर्दा डर्टमुन्डका राफयल गुरेइरो र निकलस सुलले बराबरी गोल फर्काए । घरेलु मैदान सिग्न इडुना पार्कमा एन्ड्रिएस हान्चे ओल्सेनको गोलबाट बायर्न खेलमा पछि परेको थियो ।

१९औं मिनेटमा सेवास्टियन हालेर पेनाल्टीमा चुक्दा डर्टमुन्ड बराबरीबाट चुक्यो । २४औं मिनेटमा करिम ओनिसिओले गोल गरेपछि डर्टमुन्ड खेलमा २–० ले पछि पर्यो ।

६९औं मिनेटमा राफयल गुरेइरोले गोल गर्दै डर्टमुन्डलाई खेलमा कायम राखे । इन्ज्युरी समयको थप गरिएको छैटौं मिनेटमा निकलस सुलले गोल गर्दै टोलीलाई हारबाट जोगाएपनि च्याम्पियन बनाउन सकेन ।

यस बराबरीले डर्टमुन्डले ३४ खेलबाट ७१ अंक जोड्यो । डर्टमुन्ड गोल अन्तर र हेड टु हेडमा बायर्नसँग पछि पर्दै उपाधिबाट वञ्चित बन्यो । माइन्ज ४६ अंक जोडेर नवौं स्थानमा रह्यो ।

आरबी लाइप्जिग र युनियन बर्लिन शीर्ष चारमा रहँदै अर्काे सिजनको च्याम्पियन्स लिगमा छनोट हुन सफल भयो । फ्रेइवर्गले युरोपा लिग तथा बायर लिभरकुसनले युरोपा कन्फ्रेन्स लिग खेल्ने भएको छ । साल्के र हर्था बर्लिन रेलिगेसनमा पर्दा भिएफबी स्टुटगार्ट रेलिगेसन प्ले अफ खेल्नुपर्नेछ छ ।