एजेन्सी – ल्युटन टाउनले अर्को सिजन इंग्लिस प्रिमियर लिग खेल्ने भएको छ । इंग्लिस फुटबलको दोस्रो श्रेणी अर्थात च्याम्पियनसिपको प्लेअफ फाइनलमा कभेन्ट्री सिटीलाई सडन डेथमा हराउँदै ल्युटनले शीर्ष डिभिजनको यात्रा तय गरेको हो ।

निर्धारित ९० मिनेटको खेल १-१ को बराबरीमा टुंगिएपछि थप ३० मिनेटमा पनि गोल हुन सकेको थिएन । टाइब्रेकरमा दुवै टोलीको ५-५ गोल भएपछि सडन डेथमा कभेन्ट्रीका फान्काती डाबो चुकेका थिए ।

खेलको २३ औं मिनेटमा ल्युटनले जोर्डन क्लार्कको गोलमा अग्रता लिएको थियो । ६६ औं मिनेटमा गुस्ताभो हेमरले खेल बराबरीमा ल्याएका थिए । ९० मिनेटको खेल बराबरीमा सकिएपछि १ सय १७ औं मिनेटमा ल्युटनको गोल भीएआरले मान्यता दिएको थिएन । तर सडन डेथमा ल्युटनले सबै ६ प्रहारमा गोल गर्दै जित हासिल गर्यो ।

ल्युटन ३१ वर्षपछि शीर्ष डिभिजन फुटबलमा फर्किएको हो । प्रिमियर लिगको स्थापनायता टोली पहिलो पटक यो स्तरमा खेलिरहेको छ ।

यसअघि बर्नलीले पनि लिगको शीर्षस्थानमा रहेर बढुवा पक्का गरिसकेको छ । म्यानचेस्टर सिटीका पूर्व डिफेन्डर भिन्सेन्ट कम्पनीको प्रशिक्षणमा रहेको बर्नलीसँगै सेफिल्ड युनाइटेडले पनि दोस्रो हुँदै लिगमा पुनरागमन गरेको हो ।