काठमाडौं (हाम्रो खेलकुद) – काठमाडौं किकर्स फुटबल एकेडेमीको यू १३ टिमले जर्मनीको म्युनिकमा फिन्च्त जुनियर फुटबल ५४ औं भीआर बैंक कप २०२३ मा सोमबार दुई खेलमा जित हासिल गर्दै ११ औं भएको छ ।

एसभी मामेन्डर्फले आयोजना गरेको तीन दिने प्रतियोगिताको अन्तिम दिन काठमाडौं किकर्स विशांख कार्की र अबिन भट्टराईको गोलमा टीएसभी मुरेनवेइसलाई २–० ले हराएर समूह २ को छैटौं स्थानमा रह्यो । त्यसैले किकर्सले ११ औं स्थानको लागि समूह १ मा छैटौं वरियतामा रहेको टीएसभी गेल्टेन्डोर्फविरुद्ध प्लेअफमा खेल्नुपर्यो, जसमा किकर्सले ३–१ को जित निकाल्यो । १–० ले पछाडि परेको स्थितिमा सुधार गरेर हात पारेको जितमा अबिनले २ गोल गरे भने अंगश भुषालले १ गोल गरे ।

काठमाडौं किकर्स यू १३ मा सहभागि १६ टिममध्ये पाँच टिमलाई पछाडि पार्दै ११ औं स्थानमा भएको हो । सुरुका तीन खेल हारेको किकर्सले प्रतियोगितामा ३ जित, १ बराबर र ४ हारको नतिजा निकाल्यो । समूह चरणमा किकर्सलाई २–१ ले पराजित गरेको एफएसभी इचिङ यू १३ च्याम्पियन बन्यो ।

किकर्स ५६ वर्षअघि सुरु भएको फिन्च्त जुनियर फुटबलमा सहभागि हुने पहिलो नेपाली टोली हो । ६ वर्षदेखि १५ वर्षसम्मका ६ वटा उमेर समूहका प्रतियोगिता आयोजना गरिएको ५४ औं संस्करणमा २० क्लबका ६४ टोलीको सहभागि भएका थिए । उनीहरूवीच २ सय ९० खेल भए । कोभिड १९ महामारीअघि फ्रान्स, इटाली, स्वीटजरल्यान्ड, अस्ट्रियालगायत युरोपका विभिन्न देशका क्लब सहभागि हुने यस प्रतियोगितामा यसपाली एक्लो विदेशी टिमको रुपमा नेपालको काठमाडौं किकर्सले प्रतिस्पर्धा गरेको किकर्सका अध्यक्ष नवीन पान्डेले जानकारी दिए ।।