एजेन्सी – यो सिजनको स्पेनिस ला लिगाको च्याम्पियन बनिसकेको क्याटलान क्लब बार्सिलोनाले लिगको अन्तिम खेलमा पराजित भएको छ ।

बार्सिलोना घरेलु टोली सेल्टा डि भिगोसँग २–१ ले पराजित भएको हो । सेल्टाको जितमा गाब्रिएल भेइगाले दुवै गोल गरे । बार्सिलोनाका अन्सु फातीले एक गोल फर्काए ।

एवान्का वालाइडोस भिगोमा आइतबार राति भएको खेलको ११औं मिनेटमा फ्रान्क केस्सीले गोल गरेपनि भिएआरबाट अफसाइड ठहरिदा गोलले मान्यता नपाउँदा बार्सिलोना अग्रता लिनबाट चुक्यो ।

४२औं मिनेटमा गाब्रिएल भेइगाले गोल गर्दै घरेलु टोलीलाई १–० को अग्रता दिलाए । उनले हरिस सेफेरोभिचको पासमा गोल गर्न सफल भए । ६५औं मिनेटमा गाब्रिएल भेइगाले व्यक्तिगत र टोलीका लागि दोस्रो गोल गरेपछि बार्सिलोना खेलमा २–० ले पछि पर्यो ।

दुई गोलले पछि परेको बार्सिलोनाले घरेलु टोलीमाथि लगातार दवाव बढाएर एक गोल गर्न सफल भएपनि नतिजा बदल्न सकेन । ७९औं मिनेटमा अन्सु फातीले गोल गर्दै खेलमा फर्कने संकेत दिएपनि त्यसपछि थप गोल निस्कन नसक्दा बार्सिलोना ला लिगाको अन्तिम खेलमा पराजित हुन पुग्यो ।

पछिल्लो चार खेलमा बार्सिलोनाको यो तेस्रो हार हो । रियल सोसिडाडसाग २–१ ले पराजित भएको बार्सिलोनाले त्यसपछि रियल भालाडोलिडसाग ३–१ ले पराजित हुँदा मलोर्कालाई ३–० ले पराजित गरेको थियो ।

यस हारसँगै शीर्षस्थानमा रहेर च्याम्पियन बनिसकेको बार्सिलोनाले ३८ खेलबाट ८८ अंक बटुल्यो । बार्सिलोनालाई हराएको सेल्टा ४३ अंक जोडेर १३औं स्थानमा रह्यो ।