एजेन्सी – इटालियन सिरी ‘ए’ च्याम्पियन नेपोली र एसी मिलानले यो सिजनको सिरी ‘ए’ को अन्तिम खेलमा सफलता हात पारेका छन् ।

नेपोलीले घरेलु मैदानमा साम्पडोरियालाई २–० ले पराजित गरेको हो । नेपोलीको जितमा भिक्टर ओसिमहेन र जियोभानी सिमिओनले गोल गरे । दुवै गोल दोस्रो हाफमा भएको थियो ।

स्टेडियो डिएगो अर्मान्डो म्याराडोना स्टेडियम नेपोलीका आइतबार राति भएको खेलको ६४औं मिनेटमा भिक्टरको पेनाल्टी गोलबाट नेपोलीले १–० को अग्रता लिन सफल भयो ।

त्यसपछि ८५औं मिनेटमा जियोभानी सिमिओनले गोल गर्दै नेपोलीको जित पक्का गरे । उनले जियाकोमो रास्पडोरीको पासमा गोल गर्न सफल भएका थिए ।

यस जितसँगै च्याम्पियन नेपोलीले ३८ खेलबाट ९० अंक बटुल्यो । पराजित साम्पडोरिया १९ अंक जोडेर पुछारमा रह्यो । साम्पडोरिया यसअघि नै रेलिगेसनमा परिसकेको टोली हो ।

सिरी ‘ए’ कै अर्काे खेलमा एसी मिलानले हेलास भेरोनालाई ३–१ ले पराजित गरेको छ । मिलानको जितमा राफयल लियोले दुई तथा ओलिभर जिरुडले एक गोल गरे । हेलास भेरोनाका मार्काे डाभिड फाराओनीले एक गोल फर्काए ।

यस जितसँगै ३८ खेलबाट ७० अंक जोडेर चौथो स्थानमा रह्यो । पराजित हेलास भेरोना ३१ अंक जोडेर रेलिगेसनमा परेको छ ।

यस्तै अर्काे खेलमा युभेन्ट्सले उडिनेसलाई उसकै मैदानमा १–० ले पराजित गरेको छ । युभेन्ट्सको जितमा फेडरिको चिइसाले दोस्रो हाफमा गरेको गोल निर्णायक बन्यो । उनले ६८औं मिनेटमा गोल गर्न सफल भएका थिए ।

यस जितले युभेन्ट्स ३८ खेलबाट ६२ अंक जोडेर सातौं स्थानमा रह्यो । खेलाडी अनुबन्धमा कानुन उल्लंघन गरेको भन्दै १० अंक कटौती गरिएपछि युभेन्ट्स शीर्ष चारमा रहँदै च्याम्पियन्स लिग खेल्नबाट वञ्चित रह्यो ।

१० अंक कटौती नगरिएको भए युभेन्ट्स ७२ अंक जोडेर शीर्ष चारमा रहेर च्याम्पियन्स लिगको लागि छनोट हुने थियो । पराजित उडिनेस ४६ अंक जोडेर १२औं स्थानम रह्यो ।

अन्य नतिजा
एटलान्टाविरुद्ध मोन्जा (५–२)
लिसविरुद्ध बोलोग्ना (२–३)
रोमाविरुद्ध स्पेजिया (२–१)