काठमाडौं (हाम्रो खेलकुद) – सहिद स्मारक ‘ए’ डिभिजन लिग फुटबल अन्तर्गत आज शुक्रबारदेखि अन्तिम (२६औंं) चरणका खेलहरु हुँदैछ ।

लिगको अन्तिम चरणको पहिलो दिन आज विभिन्न चार खेलमा प्रतिस्पर्धा हुँदैछ । जसमा दुई खेल त्रिपुरेश्वरस्थित दशरथ रंगशालामा हुनेछ । एक खेल एन्फा कम्पेल्क्स र एक खेल च्यासल मैदानमा हुनेछ ।

दशरथ रंगशालामा दिउँसो ३ बजेपछि रेलिगेसनको दवाव झेलिरहेको नेपाल एपीएफ फुटबल क्लब र फ्रेन्ड्स क्लबबीच प्रतिस्पर्धा हुनेछ । बराबरीको नतिजाले पनि रेलिगेसन जोगिने एपीएफ जित निकाल्दै सिजनको अन्तय गर्न चहान्छ । एपीएफ २५ खेलमा ३० अंक जोडेर ११औं स्थानमा छ ।

रेलिगेसनबाट बच्न फ्रेन्ड्सलाई जित्नैपर्ने दबाब छ । हार या बराबरीको नतिजाले फ्रेन्ड्स रेलिगेसनमा पर्नेछ । जितको नतिजामा पनि फ्रेन्ड्सको रेलिगेसन थ्री स्टारको प्रदर्शनमा भर पर्नेछ । फ्रेन्ड्स २५ खेलमा २७ अंक जोडेर १३औं स्थानमा छ ।

एन्फा कम्प्लेक्समा पुछारमा रहेको एफसी खुमलटार र यो सिजनको च्याम्पियन बनिसकेको चर्च ब्वाइज युनाईटेडबीच प्रतिस्पर्धा हुनेछ । यो खेल दिउँसो ३ बजे सुरु हुनेछ ।

रेलिगेसनबाट जोगिन गणितीय सम्भावना राख्न पनि खुमलटारलाई जित्नैपर्ने दबाब छ । खुमलटारलाई जितको नतिजाले मात्रै पुग्दैन रंगशालामा हुने एपिएफ र फ्रेन्ड्सको खेल तथा भोलि हुने थ्री स्टारको नतिजामा भर पर्नुपर्नेछ ।

बराबरी या हारको नतिजाले खुमलटार डेब्यु सिजनमा नै रेलिगेसनमा पर्नेछ । खुमलटार २५ खेलमा २७ अंक जोडेर पुछारमा रहेको छ ।

खुमलटार गत वर्ष ‘बी’ को उपविजेता बनेर शीर्ष डिभिजनमा उक्लिएको थियो । त्यसको ठीक विपरित ‘बी’ च्याम्पियन बनेको चर्च ब्वाइज युनाइटेड डेब्यु सिजनमै शीर्ष डिभिजनको च्याम्पियन बनिसकेको छ ।

यता, एक खेल अगावै च्याम्पियन बनिसकेको चर्च ब्वाइज खुमलटारलाई हराएर सिजनको सुखद अन्त्य गर्दै लिगको उपाधि उचाल्न चहान्छ । चर्च ब्वाइजको २५ खेलमा ४५ अंक छ ।

च्यासल मैदानमा नेपाल पुलिस क्लब र सातदोबाटो युथ क्लबबीचको खेल दिउँसो ३ बजे सुरु हुनेछ । पहिलो राउन्डमा रेलिगेसनको दवाव झेलेको पुलिसले दोस्रो राउन्डमा भने सानदार प्रदर्शन गर्दै शीर्ष तीनमा पुगेको छ ।

सातदोबाटोलाई हराएर पुलिस लिगको सुखद् अन्त्य गर्न चहान्छ । तेस्रो स्थानमा रहेको पुलिसको २५ खेलबाट ३८ अंक छ । सातदोबाटो पनि पुलिसलाई हराएर सिजनको सुखद् अन्यत गर्न चहान्छ । पाँचौं स्थानमा रहेको सातदोबाटोको २५ खेलमा ३५ अंक छ ।

दशरथ रंगशालामा साँझ ६ बजे त्रिभुवन आर्मी फुटबल क्लब र हिमालयन शेर्पा क्लबबीच प्रतिस्पर्धा हुनेछ । आर्मी २५ खेलमा ३१ अंक जोडेर आठौं स्थानमा रहेको छ ।

हिमालयन २५ खेलमा ३१ अंक जोडेर १०औं स्थानमा रहेको छ । रेलिगेसनको संकट टारिसकेको दुवै टोली नतिजा आफ्नो पक्षमा पार्दै लिगको सुखद अन्त्य गर्न चहान्छ ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिटलगायत सम्पूर्ण जानकारीका लागि यहाँ थिच्नुहोस ।