हिमाल खरेल, बिर्तामोड

प्रदेश खेलकुद विकास बोर्ड कोशी प्रदेशले पहाडी जिल्ला ओखलढुंगामा मुख्यमन्त्री कप नकआउट फुटबल प्रतियोगिता गर्ने भएको छ । बोर्डले बुधबार सुनसरीको इटहरीमा पत्रकार सम्मेलन आयोजना गरेर प्रतियोगिताबारे जानकारी दिएको हो ।

बोर्डको आयोजनामा हुने तेस्रो कोशी प्रदेश मुख्यमन्त्री कप नकआउट फुटबल प्रतियोगिता असार ४ गतेदेखि ९ गतेसम्म हुने बोर्डका सदस्य सचिव हंशराज वाग्लेले जानकारी दिए । वाग्लेका अनुसार प्रतियोगितामा कोशी प्रदेशका १४ जिल्लाको सहभागिता रहनेछ । जिल्लाको सदरमुकामस्थित सिद्धिचरण नगरपालिकामा रहेको खेलमैदानमा प्रतियोगिता हुने वाग्लेले बताए ।

ओखलढुंगामा पहिलोपटक हुन लागेको प्रतियोगिताको विजेताले २ लाख रुपैयाँ, ट्रफी, मेडल र प्रमाणपत्र पाउनेछ र दोस्रो हुने टोलीले १ लाख ट्रफी, मेडल र प्रमाणपत्र प्राप्त गर्नेछ । प्रत्येक खेलको प्लेयर अफ द म्याचले ५ हजार रुपैयाँ प्राप्त गर्नेछन् । त्यस्तै प्रतियोगिताका उत्कृष्ट गोलकिपर, रक्षक, मिडफिल्डर, फरवार्ड, प्रशिक्षक र उच्च गोलकर्ताले ५ हजार रुपैयाँ प्राप्त गर्नेछन् ।

प्रतियोगितामा खेलाडी, अफिसियल तथा निर्णायक गरेर ३ सय जना ओखलढुंगा पुग्ने बोर्डले जनाएको छ । प्रतियोगिताका लागि बोर्डले ३० लाख रुपैयाँ विनियोजन गरेको सदस्य सचिव वाग्लेले जानकारी दिए ।