एजेन्सी – रियल म्याड्रिडले स्पेनिस भेट्रान फरवार्ड जोसेलुलाई क्लबमा अनुबन्ध गरेका छन् । स्पेनिस क्लब रियलले जोसेलुलाई क्याटलान क्लब इस्पान्योलबाट लोनमा एक सिजनको लागि क्लबमा अनुबन्ध गरेको हो । स्थायी रुपमा सम्झौता गर्ने विकल्प पनि छ ।

टोलीका महत्वपूर्ण फरवार्ड तथा कप्तान करिम बेन्जेमाले रियल छाड्दै साउदी अरेबियाको अल इतिहादमा पुगेपछि क्लब नयाँ फरवार्डको खोजीमा रहेको रियलले जोसेलुलाई अनुब्नध गरेको हो ।

३३ वर्षीय जोसेलु सन् २०१२ पछि रियलमा फर्किएका हुन् । सेल्टा डि भिगोका उत्पादन जोसेलु २००९ देखि २०१२ सम्म रियलको ‘बी’ टोलीमा रहेका थिए । पछि सिनियर टोलीमा समेत परेका उनले रियलको सिनियर टोलीबाट एक खेलमा मात्रै मौका पाएका थिए ।

गत साता नै अनुबन्ध गर्ने पक्का गरेको रियलले अन्तर्राष्ट्रिय विश्रामपछि जोसेलुको अनुबन्ध प्रक्रिया पूरा गरेको हो । इस्पान्योल यो सिजन ला लिगाबाट रेलिगेसनमा परेको टोली हो । रियल म्याड्रिड अझैपनि केही गुणस्तरीय फरवार्ड भित्र्याउने योजनामा छ । जोसेलु रियलका लागि एक बलियो ब्याकअप हुन सक्नेछ ।

स्पेनको राष्ट्रिय टोलीमा समेत रहेको जोसेलु स्पेनले ११ वर्षपछि अन्तर्राष्ट्रिय उपाधि जित्दा टोलीका सदस्य हुन् । स्पेनले आइतबार राति क्रोएसियालाई टाइब्रेकरमा ५–४ ले पराजित गर्दै युइएफए नेसन्स लिगको उपाधि जित्दा टोलीका सदस्य हुन् । उनले इटालीविरुद्धको सेमिफाइनलमा २–१ को जितमा एक गोल तथा क्रोएसियाविरुद्धको फाइनलमा टाइब्रेकरमा गोल गर्न सफल भएका थिए ।

उनले गत सिजन इस्पान्योलबाट ३७ खेल खेल्दा १७ गोल गर्न सफल भएका थिए । व्यवसायिक खेल करिअरमा उनले इस्पान्योल र रियलसँगै सेल्टा भिगो, होफेनहाइन, आइनट्राख्ट फ्रान्कफुर्ट, ह्यानोभर, स्टोक सिटी, डिपोर्टिभो ला कोरुना, न्यूक्यासल युनाइटेड र एलाभेसबाट खेलिसकेका छन् ।