एजेन्सी – यो सिजन ट्रेवल उपाधि जितेका इंग्लिस क्लब म्यानचेस्टर सिटीका मिडफिल्डर स्पेनिस च्याम्पियन क्याटलान क्लब बार्सिलोना जाने भएका छन् ।

सिटीका कप्तान इल्केए गुन्डोगन यस महिनाको अन्त्यसँगै फ्रि ट्रान्सफरमा बार्सिलोना जाने पक्का भएको हो । सिटीको गुन्डोगानको सम्झौता यो सिजनको अन्त्यसँगै सकिदैछ ।

३२ वर्षीय गुन्डोगानलाई सिटीले सम्झौताको प्रस्ताव राखेपनि गुन्डोगानले बार्सिलोना जाने निर्णय गरेको बुझिएको छ । उनले स्पेनिस च्याम्पियन बार्सिलोनासँग ३ वर्षको आकर्षक सम्झौता गरेको मानिएको छ ।

सिटीका प्रशिक्षक पेप गुआर्डिओला यस सिजन ट्रेबल जित्ने क्लबका लागि अभिन्न अंग भएका गुन्डोगानलाई राख्न इच्छुक थिए । जर्मनीका मिडफिल्डरले २०२२–२३ मा सिटीका लागि ५१ खेल खेलेर ११ गोल गरेका छन् ।

एफए कपको फाइनलमा म्यानचेस्टर युनाइटेडमाथि २–१ को जितमा उनले दुवै गोल गरेका थिए । उनले आफ्नो अन्तिम सात खेलमा ६ गोल गर्दै सिटीमा आफ्नो प्रभाव जमाएका थिए ।

च्याम्पियन्स लिगको फाइनलमा सिटीले इन्टर मिलानलाई १–० ले हराएर यो सिजन प्रिमियर लिग र एफए कपको उपाधि जित्दा उनले पुरै ९० मिनेट खेलेका थिए ।

सिटीले क्रोएसियाका मिडफिल्डर माटियो कोभासिसलाई ३० मिलियन पाउन्डमा अनुबन्ध गरेपछि गुन्डोगानको प्रस्थान तय भएको हो । सन् २०१६ मा २० मिलियन पाउन्डमा सिटीमा अनुबन्ध भएका उनले सिटीका लागि ३०४ खेलमा ६० गोल गरेका छन् ।

इतिहाद स्टेडियममा आफ्नो सात वर्षको अवधिमा उनलले १४ उपाधि जितेक ाछन् । जसमा पाँच प्रिमियर लिग, एक च्याम्पियन्स लिग, दुई एफए कप, चार कारबाओ कप र दुई कम्युनिटी शिल्ड छन् । ब्राजिली मिडफिल्डर फर्नान्डिन्होले क्लब छाडेपछि सिटीले २०२२–२३ को सिजनको सुरुमै उनलाई कप्तान बनाइएको थियो ।