एजेन्सी – इंग्लिस क्लब न्यूक्यासल युनाइटेड इटालीका मिडफिल्डर सान्द्रो टोनालीलाई अनुबन्ध नजिक पुगेकोछ । न्यूक्यासलले सान्द्रो टोनालीलाई इटालियन सिरी ए क्लब एसी मिलानबाट अनुबन्ध गर्न नजिक पुगेको उनका एजेन्टले बताएका छन् ।

२३ वर्षीय टोनालीले न्यूक्यासलमा ६ वर्षको हस्ताक्षर गर्ने र केही दिनमा नै मेडिकल लगायत कागजी प्रक्रिया पूरा गरिने अपेक्षा गरिएको छ ।

इटालियन मिडियासँग कुराकानीमा टोनालीका एजेन्ट ज्युसेप रिसोले एड–अनहरूसहित ८० मिलियन युरोमा स्थानान्तरण हुन सक्ने बताए । उनले दुवै पक्षबीच अन्तिम बिवरणमा सहमति भईरहेको बताए ।

न्युक्यासल र टोनालीबीच व्यक्तिगत सम्झौता भएको रिसोले बताए । टोनालीले मिलानलाई २०२१–२२ मा इटालियन उपाधि जिताउन मद्दत गरे र गत सिजन च्याम्पियन्स लिगको सेमिफाइनलमा पुग्ने टोलीको हिस्सा बने ।

टोनालीले ब्रेसियाबाट व्यवसायिक खेल करिअर शुरु गरे । ब्रेसिया २०१९–२० को सिजनमा सिरी ‘ए’ मा बढुवा भएको थियो । तर, क्लब अर्काे सिजन नै रेलिगेसनमा पर्यो । ब्रेसिया रेलिगेसनमा परेपनि उच्च प्रदर्शन गरिरहेका उनले इटालीको सिनियर राष्ट्रिय टोलीमा डेब्युको मौका पाए ।

उनी २०२० को समरमा लोनमा एसी मिलानमा सामेल भए र अर्को वर्ष यस कदमलाई स्थायी बने । क्लबले २०२२ मा इटालियन उपाधि जित्दा उनले ३६ खेलमा पाँच गोल गरे । उनले यो सिजन मिलानबाट ४८ खेल खेल्दा २ गोल गरे । उनले इटालीका लागि १४ क्याप जितिसकेका छन् ।