काठमाडौं (हाम्रो खेलकुद) – बंगलादेशको जितसँगै भारतको बैंगलरुमा जारी साफ च्याम्पियनसिपको सेमिफाइनलको समिकरण पूरा भएको छ ।

कान्तिरभा फुटबल मैदानमा बुधबार भएको खेलमा भुटानलाई ३–१ ले हराउँदै बंगलादेश समूह बीको उपविजेताका रुपमा सेमिफाइनल पुगेको हो । सन् २००९ पछि बंगलादेश पहिलो पटक साफ च्याम्पियनसिपको अन्तिम चारमा पुग्न सफल भएको हो । त्यसअघि भएको खेलमा लेवननले माल्दिभ्सलाई १–० ले हराउँदै समूह बीको विजेता बनेको थियो । अब सेमिफाइनलमा लेवनाने भारतको र बंगलादेशले कुवेतको सामना गर्नेछ ।

भुटान यसअघि नै प्रतियोगितबाट बाहिरिसकेको थियो भने लेवननसँगको हारपछि माल्दिभ्स पनि बाहिरिएको छ । भुटाने १२ औं मिनेटमा लिएको अग्रता जोगाउन सकेन । नाम्गेलको गोलमा भुटान अघि लागेको थियो । शेख मोर्सलिनले २२ औं मिनेटमा बराबरी गोल गर्दै बंगलादेशाई खेलमा फर्काएका थिए ।

३१ औं मिनेटमा फिन्त्सु जिग्मेको आत्मघाती गोलमा बंगलादेशले अग्रता बबबनाएको ३६ औं मिनेटमा रविक हुसेनले गोल गरेपछि बंगलादेशको अग्रता बढेको थियो । अघिल्लो खेल माल्दिभ्सविरुद्ध खेलमा पछि परेको बंगलादेशले नतिजा उल्टाएको थियो । समूह चरणमा लेवनानको ९ अंक, बंगलादेशको ६ अंक रह्यो । बाहिरिएको माल्दिभ्सको ३ अंक र भुटान अंक विहिन रह्यो ।

अब शनिबार हुने पहिलो सेमिफाइनल कुवेत र बंगलादेश तथा दोस्रो सेमिफाइनल भारत र लेवनानबीच हुनेछ । समूह एबाट नेपाल र पाकिस्तान समूह चरणबाटै बाहिरिएका थिए ।